Shillong, Naitung 26:
Ka jingleh jong ki katto katne ki kolej kiba thmu ban pdiang ïa ka National Education Policy (NEP) lada pyntreikam noh naduh mynta kan wan jingeh shibun ïa ki samla pule bad kan don ruh ka jingïapher hapdeng ki khynnah kiba pule ha ki kolej ki bym lah ban pyntreikam ïa ka NEP.
Kumta namar ka jingïohi lypa ban mad jingeh ki samla pule khamtam ki kolej ha thaiñ nongkyndong, na ka liang ka North Eastern Hill University Students’ Union (NEHUSU) ka la leit ïakynduh ïa u Myntri ka tnat pule puthi ka Jylla u Rakkam A Sangma ban pynsngew ha u ïa ki jingeh jong ki kolej bad ki samla pule khamta namarba ki la dep ban pynrung klas ïalade naduh u Jylliew mynta u snem ha kaba ki kolej ruh ki khlem da pynkhreh ban pyntreikam ïa ka NEP.
Haba kren sha ki lad pathai khubor, u President ka NEHUSU, u samla Readyfirst June Nongbsap u la ong ba na ka liang u Myntri ka tnat pule puthi u la ïathuh ba ka Sorkar Jylla ka la dep phah jingthoh ar sien sha u VC ka NEHU ban nym pat pyntreikam ïa ka NEP naduh mynta u snem, bad ka Sorkar kan sa phah jingthoh biang sa shisien sha u VC ka NEHU ban buhteng ïa ka jingpyntreikam ïa ka NEP.
Ka NEHUSU ka la kren shai ba kum ki samla pule ki pdiang ïa ka NEP hynrei ban pyntreikam noh mar mar naduh mynta u snem, kam pat long kaba biang namar ki mih ki jingeh naduh ki sobjek kiba dei ban hikai, ka jingdon ki nonghikai ban hikai ïa kita ki sobjek, bad ka jingbym biang ki jingdonkam ha ki jaka pule naduh ki jingtei jingshna, bad ka jingbym pat biang ka jingpynkhreh kan ktah ïa ka lawei ki samla pule.
Haba ther ïa u VC ka NEHU, ka NEHUSU ka la kynnoh ba u la leh marwei namar wat ha ka Academic Council jong ka NEHU kaba dei kaba hakhliehduh, ka dang don tang ka jingïakren ban pynkhreh lypa hynrei ym pat shim rai ban pyntreikam noh.
“Une u VC um trei na ka bynta ka bha ka miat ki samla pule hynrei u leh tang ban pynhun ïa ki heh jong u Delhi ban pyntreikam noh ïa ka NEP,” la ong u Finance Secretary ka NEHUSU u samla Mandor Diengdoh Swer.
Kine ki samla pule ki la ong ba kin mih shakhmat bad ïatylli lang ban ïakhun ïa kane ka jingleh bymdei u VC bad kane ka jingleh jong u ka pynbor ban dawa biang ban thung VC da ki trai muluk bad ban dawa weng noh ïa u.
“Ka jingpyntreikam ïa ka NEP naduh mynta kan wanrah ka jingkulmar ïa ki samla pule namar ki samla kiba leit ha ki kolej kiba la pdiang ïa ka NEP ki hap pyndep saw snem ban ïoh ïa ka degree bad kito kiba leit ha ki kolej ki bym pat pdiang ïa ka NEP kin pyndep lai snem ïa ka degree. Lada ka long kumne kan sa mih ka jingeh bad kan don ka jingïapher namar lehse kito kiba la pyndep ïa ka degree khlem ka NEP kin nym ïoh pynban ka jingithuh. Kumta ka NEP kam dei ban treikam shiliang bad pynïapait ïa ki kolej bad ki samla pule hynrei ka dei ban treikam lang kumjuh ynda la sdang pyntreikam ha u snem ban wan ym ban sdang naduh mynta,” la ong u Viceprsent u samla Easterson Sohtun.
Ka NEHUSU ka buh jingkylli ruh katno ngut ki Principal bad kiba dei na kino ki kolej kiba la wan sha ka jingïalang halor ka NEP hapoh ka jingpeit ka Academic Council.
Ki la ong ruh ba ka Academic Council ka dei ka bor kaba hakhliehduh bad lada kam dei kumta, ym myntoi ban don kata ka Academic Council ha kane ka skulbah lada u VC u lah ban shim rai marwei.
