Shillong, Naitung 26:
Ka Trinamool Congress (TMC) Meghalaya ka la kynnoh ba hapoh ka jingïalam u DGP ka Jylla, Dr. L.R. Bishnoi, ki pulit ki la buh jingma ïa ka jingim u Myntri Rangbah ka Jylla, u Conrad K. Sangma kumjuh ïa ka jingim jong kiba bun ki ’riew lui-lui kiba la ïalum da ka jingjai-jai hakhmat ka shlem treikam u Myntri Rangbah ha Tura.
Ka TMC ka la pynpaw ka jingkyndit ïa ka jingkren u DGP ka Jylla halor ka jingtohkit ba mardor na ka liang ki pulit haba ïadei bad ka jingjia kaba la jia ha ka 24 tarik mynta u bnai ha Tura.
Ka seng ka la ong ba katei ka jingkren ka kdew shai ïa ka jingbym larkam bad jingpulom jong ka tnad pulit hapoh ka jingïalam u Dr. Bishnoi, ha kawei ka liang kaba la ïalam sha ka jingpynkulmar jong u paidbhur bad kiwei-kiwei ki jingjia.
Halor ka jingong u DGP ba ka la don lypa ka jingïasylla ban pynmynsaw ïa u Myntri Rangbah, ka seng lyngba ka kyrwoh ka Media Cell, ka la ong ba kane ka pyni ïa ka jingbym larkam bad ka jingpulom jong ka tnad pulit ha ka ban lap shuwa ïa katei ka jingïasylla ha ka por kaba biang – ha ka por ba dang pyrkhat ïa ka.
“Hapoh u Dr. Bishnoi, ki pulit ki la buh jingma ïa ka jingim u Myntri Rangbah kumjuh ïa ka jingim jong kiba bun ki ’riew lui-lui kiba la ïalum da ka jingjai-jai hakhmat ka shlem treikam u Myntri Rangbah ha Tura,” la ong ka seng.
Ka la ong ruh ba ka tnad pulit kam shym la shimkhia halor ka jingbitar pyrshah ïa kawei ka Myntri Sorkar ha shuwa ka jingwan jngoh jong ka sha Tura. Ki jingthoh ha ki rynsan lad pathai ki pynpaw ïa ki jingsngew bad ki jingagnud kiba jur bad wat ki MLA ki la shah kynthoh (ha ki rynsan lad pathai).
“Kane ka kdew shai ba ka tnad pulit ka don bynta ban shah ïa ka jingkulmar ba kan jia bad ka la buh jingma ïa ka jingim jong u Myntri Rangbah. Ka don kaei-kaei kaba heh kaba pyrshang ban pynthohbria ïa kiba lui-lui, kynthei, nongïalam, seng saiñ pyrthei bad wat ki kynhun seng,” la ong ka TMC ha ka kyrwoh.
Ka seng ka la ong ruh ba u DGP ha ka jingkren jong u, u la kynnoh ïa katto-katne ki nongïasylla kiba la dep pyrkhat ban pynmynsaw ïa u Myntri Rangbah katba u dang ïakynduh ïa ki nongshong shnong ha konstitwensi jong u.
“Ki pulit kumta haba pyntip sha ngi ba u Myntri Rangbah u la shah buh dak ha la ki jong ki briew napoh konstitwensi bad um long shngaiñ wat ha la ka jong ka konstiwensi!” la ong ka seng.
Halor kitei ki daw, ka TMC-Meghalaya ka dawa mardor ïa ka jingtohkit kaba laitluid hapoh ka jingkhmih jong ka ïingbishar ba hakhliehduh ka Jylla ban tohkit halor ka jingkulmar kaba la jia ha Tura ha ka 24 tarik mynta u bnai.
Shuh shuh ka seng ka la bynrap, “Dei ban sospon mardor ïa u DGP ka Jylla bad SP, Tura namar ka jingbym larkam jong ki ha ka ban pyndep la ka kamram ba la bynshet ha ki – ka la buh jingma ïa ka jingim u Myntri Rangbah ka Jylla kumjuh ïa ki jingim jong kiba bun ki ’riew lui-lui kiba la ïashim bynta ha ka jingïalang. Ym lah ban kyntait ïa ka jingdon bynta jong ki pulit ha ka ban pynshit ïa ka jingkulmar wat hapdeng ka jingtip jong ki halor ka jingïasylla kaba la dep pyrkhat lypa hashuwa jong ka por.”
Na ka liang ka seng ka pynrem jur ïa kito kiba donkti ha katei ka jingkulmar bad kyrpad na bynta ka shong suk shong shngaiñ.
“Ym lah ban pynbeit ïa ki jingeh da ka jingkulmar. Ki jingïakren ki dei ban long da ka lynti bad ka jingshngaiñ jong ki paidbah ka dei ban long kaba hakhmat eh na bynta baroh,” la pynkut ka kyrwoh na ka seng.
