Tura, Naitung 26:
Haduh 35 ngut ki briew kiba la kynnoh don bynta ban kynshoit thaw jingkulmar kaba la jia shabar ka shlem treikam u Myntri Rangbah ha Tura, ki la shah kem noh ha ki pulit ka West Garo Hills.
Nalor kine ki 35 ngut, ki pulit ki la ïoh kem ruh ïa uwei u briew uba la wer ïa ki paidbah ban ïeng ïakhun pyrshah ïa ki bor Sorkar bad ban hiar thma ïa ka ïingsah jong u Myntri Rangbah ka jylla u Conrad K Sangma kaba don ha Tura. Une u briew uba la wer ïa ki paidbah lyngba ki jingthoh ha ki rynsan social media, u dei ba kyrteng u Sengbath D Sangma.
Katkum ka khubor pulit, une u briew u la pynsaphriang ïa ka jingthoh ha ki rynsan social media ban wer ïa ki paidbah ba kin ïakhih paidbah noh nalor ban hiar thma ïa ka ïingsah u Myntri Rangbah kaba don ha Tura.
Nalor kane, la pyntip ba ki pulit ki la kem ruh ïa kawei ka nongïalam seng ba paw ka thaiñ kaba la tip kyrteng kum ka Jaynie Sangma.
