Shillong, Naitung 26:
Haduh hynñiew ngut ki snar nongtuh ïa ki ar shaka (bike) ki la ngat ha kti jong ki pulit ka East Khasi Hills bad na kine la ïoh ruh ban kurup haduh 4 tylli ki bike Pulsar kiba ki la tuh na East Khasi Hills District.
Katkum ka kyrwoh khubor ba la pyllait da u Superintendent of Police (SP) ka East Khasi Hills u Bah Sylvester Nongtnger la ïathuh ba ïa kine ki 7 ngut ki snar nongtuh ki pulit ki la ïoh kem na ki jaka bapher bapher, kata 3 ngut la ïoh ban kem na Amlarem, 3 ngut na Pynursla bad ïa uwei na Shallang.
U Bah Nongtnger u la pyntip ba ha ka 15 tarik mynta u bnai ki pulit ka thanat Mawngap ki la ïohpdiang ïa ka ejahar ba shah tuh kawei ka thuk-thuk ML05-P-6045 na Umlympung, 12 Mer, Mylliem bad mar-mar ki la register case bad pynlong ïa ka jingtohkit.
U SP u la ong ba halor ki khubor syntiat, ki pulit ki la pynlong ïa ka jingap shrip ïa kine ki nongtuh bad la ïoh ban kem shwa ïa ki lai ngut na Amlarem bad ïa katei ka thuk thuk ba la tuh la ïoh kurup na Padu, Amlarem.
U la ïathuh ba hadien kane, ki pulit ki la kem sa lai ngut pat ki runar na Pynursla kiba ïa donkti lang ha kane ka kam tuh thuk thuk. U SP u la pyntip ruh ba ha ka jingtohkit shuh shuh, ki pulit ki la ïoh ban kurup biang sa kawei ka Pulsar 150 na Amlarem bad kawei pat ka Pulsar 220 na Pynursla, ki bym shym la don satia ïa u nombor plate bad hadien la pynthikna ba kine ki thuk-thuk ki dei kiba tuh na Amparem bad Pynursla.
Nalor kane, u la pyntip ruh ba ha ka 25 tarik pat, ki pulit ka Laban ki la ïohpdiang ïa kawei ka ejahar ba shah tuh ka Pulsar 150 ba don ïa u nombor ML05-V-0993 na Lower Harisabha, Laban.
Hadien ka jingïohpdiang ejahar, ki pulit ki la pynlong ka jingtohkit bad hadien ka jingïoh ka jingtip kaba bniah, ki la ïoh ban kem ïa une u nongtuh na Shallang bad ruh la ïoh ban kurup ïa ka thuk-thuk na katei ka jaka.
Nalor ki thuk-thuk ba la ïoh kurup, ki pulit ki la kurup ruh noh ïa kawei ka kali Alto 800 ba don u nombor AS01-DH-2009 kaba la pyndonkam da kine ki runar ha ka ban leh ïa kane ka kam tuh kam thiem.
Shuh shuh na ka liang jong u SP u la pyntip ba ki dang don ki briew ba donkti ha kane ka kam kiba la phet rieh mynta bad ka jingthwet ka la ïaid shakhmat ban ïoh kem ïa ki.
