Nongpoh, Naitung 26:
Ki dak ki shin jong ka jingduna ha kawei na ki skul sorkar kaba don ha Ri Bhoi District ka la paw pyrthei ha ka sngi Balang hadien ba ki khynnah skul ki la ai syndon da ka jingthoh sha ka seng Federation of Khasi Jaiñtia and Garo People (FKJGP) North Khasi Hills District ban kyrpad ïarap lem ïa ki ban weng ïa ki jingeh kiba ki ïakynduh ha ka skul.
Kane ka dei kaba la jia ha ka skul Jawahar Navodaya Vidyalaya (JNV) kaba don ha Niangbari, Ri Bhoi District. Kumba la ïathuh da ki khynnah, la kynnoh ba wat hadien ba ki la ujor la bunsien sha ki bor pynïaid jong ka skul, hynrei ym don satia ba sngap ïa ka jingujor ka jong ki.
Ki khynnah skul ki la ïathuh ba napdeng kitei ki jingeh kiba ki ïakynduh, ka jingbym biang jong ka umbam umdih, ka jingaibam da ki jhur kiba la pyut bad kiba la sma, ka jingai ïa ki dawai kiba la kut tarik bad ka jingpynslem ïa ka jingsam ïa ki ‘sanitary pads’, ka jingbym biang jong ka jaka leit shabar khamtam ha ka hostel jong ki shynrang, ka jingpyrshang ban pynïapher jingmut hapdeng ki shynrang bad kynthei kaba la wanrah jingeh shikatdei ïa ki khynnah kiba pule ha katei ka skul.
Shuh shuh ki la ïathuh ruh ïa ka jingbymdon jong ka jaka theh ñiut kaba paka, ka jingbym don ïa ka khuid ka suba, ka jingbym biang jong ka madan ïalehkai, ki dei sa kiwei de ki jingeh kiba ki khynnah skul ki la pyntip sha ki nongïalam jong ka FKJGP.
Tang mar ïa ïoh jingtip halor kane, ki nongïalam ka FKJGP-NKHD ba la lamkhmat da u samla Ricky Majaw, Information Secretary bad u samla Gabriel Sun, Education Secretary lem bad ki dkhot ha ka sngi Balang ki la hiar hi dalade sha katei ka skul ban jurip markhmat ïa ki jingeh kiba ki khynnah skul ki la kynnoh.
Ha katei ka jingjurip, ka seng ka la lap ba ki jingkynnoh jong ki khynnah pule ka dei kaba shisha. Kumta na ka liang ka seng ka la dawa na ki bor pynïaid jong ka skul ba ki dei ban shim khia noh mardor ban pynbeit ïa kitei ki jingeh kiba ki khynnah pule ki ïakynduh.
Ki nongïalam ka seng ki la ong ruh ba shen kin sa la leit ban ïakynduh ïa u Deputy Commissioner ka Ri Bhoi, u Arpit Updhyaya ban ïakren na ka bynta ban shim khia ban pynbit pynbiang ïa ki jingdonkam jong ki khynnah pule ha katei ka skul kiba la mad jingeh baroh shikatta na ka jingbym shim khia ki bor pynïaid skul.
Shuh shuh halor ka jingkynnoh ba ka la don ka jingbyrngem na ki nonghikai katei ka skul ïa ki khynnah pule ba kim dei satia ban ïathuh ïa kitei ki jingeh ki jong ki shabar jong ka skul. Namar kata, na ka liang ka seng ka byrthen kylla ïa ki nonghikai ba kim dei satia ban byrngem ïa ki khynnah skul. Ka kyntu ruh ïa ki khynnah skul ba kin nym tieng nym riej, hynrei ban mih shakhmat ban ïathuh beit ïa ki jingeh ki jong ki, bad lada don kino kino ki jingeh, kin pyntip beit sha ka seng ba kan ïoh ban leh da kaba tyngeh pyrshah ïa ki nonghikai katei ka skul.
