Shillong, Naitung:
Ka [24]7.ai, kaba long ka kompani kaba lam khmat ha kaba ïadei bad ka jingai jingshakri ha ka liang ban don ka jingïakren ïa kaba la leh lyngba ka AI, dang shen ka la pynlong ïa ka tamasa ba lai sngi lynter na ka bynta ki nongtrei bad ki bahaïing hasem jong ki ïa kaba la tip kum ka ‘Summer Carnival Shillong 23’ ha ka jaka thymmai jong ka [24]7.ai ha Shillong ha STP.
Ka kompani na ka por sha ka por ka ju pynlong ïa ki bun ki rynsan bad ki lympung khnang ban khring ïa ki nongtrei bad pynshlur ïa ki ban wanrah ka jingïajan bad ha ka juh ka por ban pynlong ïa ka [24]7.ai ka jaka kaba biang ban trei ban ktah.
Ka jingthmu jong ka [24]7.ai ka long ban wanrah ïa ka jaka treikam kaba dap da ka jingkmen bad ban pynlong ïa ka kynhun ki nongtrei ba dang samla ba kin long kiba ïadon bynta bha ha ka kam bad ai mynsiem ïa ki ba kin sngew ba ki iadon bynta. Kane ka tamasa ka la khring ïa kumba 240 ngut tam ngut ki nongtrei bad ki bahaïing hasem jong ki ban leh ïa ki jingïalehkai kiba donkam ban leh lang kum ka kynhun, ki don ruh ki kynhun ne ki Passion club, bad kiwei kiwei ki jingpynbyrngia kum ka jingshondur ne Photography, Cooking ne ban shet jingshet, Artistry ne ban pyni ïa ki sap dro bad kiwei kiwei ki sap, bad ka Gaming.
Ki nongïashim bynta ki la sngewbha haduh katta katta ïa ka jingpyni ïa ki dur ki dar ne photography Exhibition, ka jingbatai shaphang kumno ban shet ne Cooking Demonstration, ka jingpyni ïa ka jingdro ne Live Painting, ki jingïalehkai ne Games bad kiwei kiwei. Ha kane ka lympung la don ruh ka jingïaid halor rynsan ne Ramp Walk ha kaba la pynkup nam Prom Queen bad King ïa ki nongtrei. Kane ka lympung ka la wanrah ïa ka jingïajan hapdeng ki nongtrei bad ka la wanrah ruh ïa ka jingïaroh na ki bahaïing hasem jong ki ruh kumjuh.
