Jowai, Naitung:
Ka Dorbar Elaka Raliang ka la rai ban ïada bad pynneh pynsah ïa ki sawdong sawkun ka mei mariang bad wanrah ka shongsuk shongsaiñ hapoh ka Elaka.
Ïa kane ka rai la shim ha ka dorbar Elaka kaba la pynïaid da u Dolloi ka Elaka Raliang u Chawas Lyngdoh ha ka jingdonlang ki Waheh Shnong na ki 40 tylli ki shnong kiba hap hapoh ka Elaka, ki longkmie longkpa bad ki samla kaba la long ha Dorbar Hall jong ka shnong Raliang ha ka Sngi Ba-ar.
Ka dorbar Elaka ka la khang ban thang lum, thang khlaw namar ka pynduh jait ïa ki jingthung bad kiwei pat ki jingthaw ba im, la khang ban siat, pynïap ïa ki sim ki doh bad ki mrad ki mreng bad la rai ban ïatreilang bad ka tnat kam khlaw.
Ha kaba ïadei pat bad ka shongsuk shongsaiñ hapoh ka Elaka khamtam ha ka por ilekshon, ka Dorbar Elaka ka la khang pyrshah ïa ki kyrtong ba ïaleh ilekshon (MDC/MLA/MP) ban wan ïalap ilekshon ha ka por ilekshon sha baroh ki shnong hapoh ka Elaka palat ïa ka 4 tylli ki kali rit kumba la ai jingbit da ka Election Commission, lait noh tang ha ka Rally.
La khang pyrshah ïa ki kyrtong ba kim bit ban ai ja lane kino-kino ki jingdih pynbuaid lait ka sha ïa ki paidbah ha ka por ba ki wan ïalap ilekshon.
Nalor kata, ka Elaka ka la bthah ïa ki Dorbar Shong bapher bapher ban pynbna shnong shisyndon ïa kine ki rai jong ka Dorbar Elaka bad ban ai ka jingïatreilang na ka bynta ka jingbha bad ka jingmyntoi jong ka Elaka baroh kawei.
