Shillong, Naitung 26
Ka President ka Ri India ha ka Sngi Ba-Ar ka la ai hukum ban thung ïa u Biswadeep Bhattacharjee ban long kum u Additional Judge ka Meghalaya High Court na ka bynta ar snem.
Kane ka hukum ka dei kaba la pynmih katkum ka Clause (1) jong ka Article 224 ka Riti Synshar ka Ri India, bad kane ka la mih ha ka shlem ai jingtip ka tnat Law and Justice ka Sorkar India.
Katkum katei ka hukum, la ong ba u Biswadeep un long kum u Additional Judge na ka bynta ar snem naduh ka sngi ba un shimti ïa ka kam.
Ka jingthung ïa u Biswadeep ka long hadien ba ka ‘Collegium’ jong ka Supreme Court ka la ai jingmut ïa ka kyrteng jong u Biswadeep uba dei u nongïasaid aiñ ba un shah thung kum u nongbishar (Judge) jong ka High Court.
Ha ka khubor ba la pynmih da ka Supreme Court, la ong ba ha ka 12 tarik Nailar, 2022, u Chief Justice ka Meghalaya High Court u la ai jingmut ban thung ïa u Bhattacharjee hadien ka jingïasyllok bad ki arngut ki dkhot ka ‘Collegium’.
Hynrei ka la ong ba ki bor synshar jong ka jylla ki khlem pat ai ïa kano-kano ka jingkynthoh ha kaba ïadei bad katei ka jingai jingmut. Namarkata, ïa kane ka jingai jingmut la phah da ka tnat Justice jong ka Sorkar India sha ka Supreme Court da kaba pyntreikam ïa ka Para 14 jong ka Memorandum of Procedure.
Kane ka kyndon ka thoh ba lada ïa ki jingkynthoh na u Lat, da ka jingai jingmut u Myntri Rangbah, kim poi hapoh hynriew bnai naduh ka sngi ba la ïoh pdiang ïa ka jingai jingmut, yn kheiñ ba ki bor synshar ka jylla kim don eiei shuh ban ong ne batai halor kata ka jingai jingmut, bad ïa kata yn lah ban nang pynïaid noh shakhmat.
Ban pynthikna la u Bhattacharjee u long ne em uba bit ba biang ban kiew sha ka kyrdan nongbishar, ka Supreme Court ka la pule ïa ki kyndon jong ka Memorandum of Procedure, u nongbishar ka Supreme Court uba tip bha shaphang ka Meghalaya High Court.
Haba la peit bniah ïa ki kot ki sla jong u Bhattacharjee kynthup ïa ki jingkynthoh na ka tnat Justice, la shem ba une u muktiar u la don ha ka kam la jan 30 snem bad u la ïasaid ha High Court halor ki mukotduma kiba bun. Nalorkata, u la long kum u Additional Advocate General ka jylla Meghalaya naduh u snem 2018. La shem ruh ba kam don satia kano-kano ka dak sniew pyrshah ïa une u muktiar.
Shuh shuh la ong ba utei u muktiar u don ka jingtip bad jingshemphang ha ki mukotduma bapher-bapher katkum ka Administration of Justice Rules ba treikam ha Meghalaya.
Namarkata, ka ‘Collegium’ jong ka Supreme Court ka la ong ba ka shem ba u Bhattacharjee u long uba biang ban shah thung kum u nongbishar ka Meghalaya High Court, bad la rai ban phah ïa ka kyrteng jong u sha ka Sorkar India ba kan thung kum u nongbishar jong kane ka High Court.
Ka High Court ha Meghalaya ka donkam saw ngut ki nongbishar, bad kumba ka long mynta, ka don tang lai ngut. Ynda u Biswadeep un shimti, ka High Court kan don saw ngut ki nongbishar kumba ka dei ka bhah.
