Shillong, Naitung 26:
Wat la u Pastor David Jamir u la sah sha Canada kaba hap ha North America haduh shiphew snem, hynrei u la iehnoh ïa katei ka ri namar u wanphai sha Shillong ban ïasyllok ïa ki briew kiba la ngop ha ki jingkyrni ïa ki jingdih basniew khamtam u drok.
U Pastor Jamir u dei uwei u nongtem ha Shillong bad shabar ka Shillong. U la tem khatduh haduh u Nohprah 1993 ban sdang ban im ka jingim kaba thymmai. Ynda u la leit pule bad ïoh lok ïoh khun sha Canada u la shah thung kum u Pastor ha ka kynhun kaba la ïasoh palat shispah tylli ki balang ha katei ka ri.
Hadien ba u Pastor Jamir u la wanphai sha Shillong ha u snem 2008, u la wad ïa ka jaka ban seng ïa kawei ka jaka ïasyllok ïa ki briew kiba ngop ha ki jingdih basniew bad u la ïoh ïa ka jaka ha Umdihar hajan Nongpoh, Ri Bhoi District bad la seng ïa kane ka kam naduh u snem 2010 kaba la ïai bteng haduh mynta mynne.
“Nga leit sha Canada ban pule bad ïoh lok syndon sha katei ka ri da ka jingmut ban ïoh ïa ka kam kaba biang, hynrei namar ka jingkhot U Blei nga la wanphai biang sha ka ri lajong ban seng syndon ïa ka Wisdom Centre ha Umdihar ban pynkylla bamut ïa ki briew kiba la ngop ha ki jingdih kiba sniew” la ong u Pastor Jamir haba ïakren kyrpang bad U Nongsaiñ Hima.
U la ïathuh ba ka jingpoi ban seng ïa kane ka jaka kaba heh haduh 7 akar ha Umdihar, ka dei namar naduh u snem 2001 haba u wan shuti sha Shillong u ju sngewtynnad ban ïasyllok ïa ki briew kiba la ngop ha ki jingdih basniew kum ka kyiad bad bun ngut ki kylla kaba mut.
“Haba nga la wanphai noh sha Shillong ha u snem 2008 haba nga la seng ïa kane ka jaka ïasyllok ha u snem 2010 ha Umdihar ki dang bun tang kiba ngop ha ka kyiad, hynrei mynta ha kine ki hynriew snem ba la dep kiba dih kyiad ki la duna hynrei ki la bun kiba la ngop ha u drok” u la ong bïang.
U Pastor Jamir u la pyntip ba naduh basdang haduh mynta ki la don palat 800 ngut kiba la lah ban ïasyllok ïa kiba la ngop ha ki jingdih basniew bad don kiba la kylla bamut bad don kiba phaidien biang sha ki kam sniew.
Nalor kata, u la ïathuh ba ha kane ka jaka ka jingpynrung ïa ki briew ban sah ka long beit hapoh 25 ngut kiba la wan na kylleng ki jaka jong ka jylla kum na Tripura, Nagaland, Manipur, Singapore bad Bhutan.
Shuh shuh u la ïathuh ba ka jingjied ka jong u sha kawei ka jaka kaba kham kynjah ha Umdihar ka long ba kito kiba la ngop ha ki jingdih basniew kin long pyngngad haba ki don ki dieng ki siej, kin sngew pyngngad haba ki ïoh ban ïalehkai bad ban ïoh ïa ka jingïasyllok man ka step.
U la ong ruh ba kito kiba mut ban wan sah hangne ki dei kiba la rai naduh ka mynsiem ban kylla kaba mut. Dei na kata ka daw um kwah ban ker ïa kane ka jaka.
Haba kylli balei ki ngop ha u drok, u la ïathuh ba katkum ka jingphla kine kiba wan sah ka dei namar ki sngewsih haba ïakhlad bad ka samla. Tang ban pynjah jingsngewsih ki sdang khyndiat ban sma ïa u drok bad suki-suki ki kyrni noh bad don ruh kiba shu pyrshang ha ka jingpynshoi paralok.
U la pynpaw ka jingsngewlyngngoh ba ki don ki khun kiba kmie ki kpa ki dei kiba riewblei, hynrei ki ngop ha u drok. Pynban haba kylli, ki phla ba ki bun kyndon palat haba sah ha ïing.
