Shillong, Naitung 26:
U SP ka East Khasi Hills, u Bah Sylvester Nongtnger, ha ka Sngi Balang, u la ong ba katkum ka jingtohkit jong ki pulit halor ka jingjia ha Mahadev Khola ha ka Lah Sngi U Blei, kan ym ïalam sha kata ka jingïakynad niam ne ka jingdonkti jong kino kino ki sengbhalang.
Kane ka jingkren jong u SP ka long hadien ba ka kynhun ‘Legal Rights Observatory’ (LRO) ka la pynsaphriang ïa ka khubor lamler ha rynsan ‘Twitter’ kaba la kynnoh ba ki dei ki dkhot ka seng Khasi Students’ Union (KSU) kiba la donkti ha katei ka jingjia ha Mahadev Khola.
Nalorkata, u Bah Nongtnger u la kren shai ba katei ka jingjia ha ka Lah Sngi U Blei ha Mahadev Khola kam dei satia na kano kano ka niam ne ka kynhun, hynrei dei tang ki ’riewshimet. U la ong ruh ba ki pulit ki la kem ïa kiba donkti bad la phah ïa ki sha ïingbishar.
U Bah Nongtnger u la ong ruh ba katkum ka jingtohkit, kan ym ïalam sha kata ka jingïakynad niam ne ka jingdonkti jong kino kino ki sengbhalang.
Haba kylli la ki pulit kin pan jingshai ne em na ka LRO halor katei ka jingkynnoh, u SP u la ong ba ki pulit ki dang pyrkhat halor kane bad kin sa pyntip kiei ki sienjam ba kin shim.
Ka LRO ha ka janmiet jong ka Lah Sngi U Blei ka la pynsaphriang ïa ka jingtip lyngba ka rynsan ‘Twitter’ ba ki dkhot ka KSU ki la donkti ha ka jingjia ha Mahadev Khola.
Lah ban kdew ba ha ka por 12 baje mynsngi jong ka Lah Sngi U Blei ka la don ka jingshah thombor jong kawei ka dukan ha Mahadev Khola.
Ka kyrwoh khubor na ki pulit ka la ong ba uwei u briew uba la wan sha Mahadev Khola, uba la pan ïa ka jingdih ‘Amul Kool’ na kawei na ki dukan kaba don ha kane ka jaka bad ong ba un sa siew pisa kham hadien hynrei hadien ba ka trai dukan ka la kyntait, une u briew u la kawang da u snepkor sha ka.
La ong ba ha ka por ba u khun jong ka, uba la 21 snem, u la wan ban tuklar ïa kane ka kam, la mih ka jingïajrong kti. Hadien kumba shiteng kynta eiei, une u briew u la wan biang ryngkat bad saw ngut kiwei pat ban thombor ïa kane ka briew bad ïa u khun jong ka, tuh ïa ka pisa na ka dukan bad ban phet krad na kane ka jaka.
Hadien ka jingïoh jingtip, ki pulit na Jhalupara OP ki la wan mar-mar sha kane ka jaka ban pynlong ka jingtohkit. Kane ka briew bad u khun jong ka, ki la mynsaw malu mala bad hadien ba la dep ban eksamin bad pyntah dawai, la pyllait noh ïa ki.
Ha kaba ïadei bad kane, la pynrung ïa ka jingujor hapoh ka thanat Lumdiengjri bad na ka liang ki pulit ki dang leh katba lah ban thwet bad kem ïa kine ki briew.
Hynnin ka sngi, u SP u la pyntip ba la ïoh ban kem noh ïa ki 3 ngut ki briew ba la kynnoh donkti ha ka jingjia ha Mahadev Khola, ha kaba kawei ka longkmie ka la shah thombor ha ka kynhun.
U SP u la pyntip ruh ba la dep ban pynrung da ka jingujor ha kaba ïadei bad katei ka jingjia ha Mahadev Khola ha thanat Lumdiengjri.
