Shillong, Naitung 26:
Ka Legal Rights Observatory (LRO) ka la ong ba ka kynhun kan sa ujor bun tylli ki ejahar ha ki pulit Assam pyrshah ïa ki nongthombor ïa ki jaka mane khnang ban kem ïa ki ynda ki wan rung sha Assam.
“Ka Khasi Students’ Union (KSU), ka kynhun bym don ki samla pule ka pynsaphriang ïa ki khubor lamler haba ïadei bad ka jingjia ha ka jaka mane – Mahadev Khola bad hadien la pynjulor ïa ka,” la ong ka LRO ha ka rynsan lad pathai ‘Twitter’.
Ka kynhun ka la ong ruh ba haba la paw pyrthei, ka seng ka la ujor pyrshah ïa ka LRO.
“Ngin sa ujor bun tylli ki ejahar ha ki pulit Assam pyrshah ki nongthombor ïa ki jaka mane khnang ba lah ban kem ïa ki ha ka por ba ki wan rung sha Assam,” la ong katei ka kynhun.
Kum ban shu kdew hangne, dang ha ka janmiet Lah Sngi U Blei, ka LRO ka la pynsaphriang ïa ka jingtip lyngba ka rynsan ‘Twitter’ ba ki dkhot ka Khasi Students’ Union (KSU) ki la donkti ha ka jingjia ha Mahadev Khola.
Lyngba ka ‘Twitter Handle’ ba la ai kyrteng ‘@LegalLro’, katei ka kynhun ka la thoh kumne: “Khasi Students Union- KSU goons attacked Mahadev Khola mandir, 101 Area Lower Iowsohtun, Shillong, Meghalaya. We can be see them assaulting priests women devotees including family of priests. Hope @SangmaConrad @MeghalayaPolice act…?” (Sic).
Haba pynwan sha ka Khasi, katei ka jingthoh ka mut: “Ki dkhot ka Khasi Students’ Union – KSU ki la thombor ïa ka Mahadev Khola Mandir, 101 Area Lower Lawsohtun, Shillong, Meghalaya. Ngi lah ban ïohi ïa ki ba ki la thombor ïa ki rangbah niam, ki kynthei/longkmie bad ki bahaïing hasem jong ki rangbah niam. Kyrmen ba u @SangmaConrad @MeghalayaPolice kin leh ïa kaba donkam.”
