Khliehriat, Naitung 27:
Ki pulit ka East Jaiñtia Hills ha ka Sngi Palei ki la ïoh ban kurup haduh 69 kilo tam u ‘Ganja’ na kawei ka kali Swift Maruti Car hadien ka jingpynap shrip ha ka surok bah NH-06 ha ka shnong Kongong ha kaba ki la kem noh ruh ïa lai ngut ki briew kiba donkti.
Ha ka kyrwoh khubor ba la pyllait, u Superintendent of Police, DSB, ka EJHD u Jagpal Singh Dhanoa, IPS u la ong, hadien ba ki la ïoh ïa ka jingtip kaba bniah halor ka jingdon jong ki lai ngut ki nongkhaïi drok ba la tip kyrteng kum u Mintu Das, Bijay Kr. Ray bad u Arvind Kumar kiba dei na Assam kiba la wan da ka kali Swift Dezire kaba don ïa u Registration No AS04-J-0171, kumta ki pulit ki la pynlong ka jingpynap shrip ha ka surok NH0-06 ha Kongong ha kaba ki la ïoh ban bat noh ïa kane ka kali lem bad ki briew kiba donkti ha ka por kumba 2:30 nohphai sngi.
Ha ka jingtalasi ïa kane ka kali ha ryngkat ka jingdon lang ki nongsakhi ba laitluid la ïoh ban kurup noh haduh 91 tylli ki song bad ha ka jingleh ïa ka test la pynthikna ba u dei u ganja uba la thmu ban khaii beaiñ.
Na kine ki lai ngut, la ïoh ruh ban kurup noh ïa ki lai tylli ki mobile phone bad la pynrung case hapoh ka thanat Khliehriat. Ka jingtohkit ka dang ïaid shakhmat khnang ban lapdien ïa kiba donkti ha kane ka kam khaïi ïa ki jingdih ba beaiñ.
