Khliehriat, Naitung:
Ka Khasi Students’ Union (KSU) Narpuh Circle bad ki nongïalam shnong ka thaiñ Narpuh ki la ai por 7 sngi ban maramot ïa ka surok National Highway 6 naduh Mynkre shaduh Malidor.
Ïa kane la ong da u nongïalam ka KSU Napuh Circle u samla KS Suchiang hadien ba la dep ai ïa ka shithi sha u Deputy Commissioner ka East Jaiñtia Hills District ha ka sngi Balang.
Une u nongïalam ka KSU u la ong ba ka NHAI ka la leh beiñ ïa ki shnong kiba hap ha ka thaiñ Narpuh naduh Mynkre shaduh sha Malidor la bun bun snem wat la ka khrong khajna na ka Toll plaza ha Lumshnong. Hynrei ka la pulom pat ban shna ne maramot ïa ka surok kaba la dap sa ki thliew ki syar bad ki pung um kaba wanrah jingeh ïa ka leit ka wan u paidbah.
U la ong ruh ba kim lah shuh ban ñiew ïa ka National Highway namar ba kam pher shuh ïa ka surok khyndew. Ka ïaid ka ïeng ki paidbah khamtam haba kit ïa ki briew kiba pang shitom ka la buh jingeh ban ïaid lyngba kane ka surok.
Kumta haba kyrpad ïa u DC, ka KSU bad ka Nongïalam shnong Narpuh ki la dawa ba ka NHAI bad ki bor ba dep peit ïa ka surok ki dei ban pynthikna ban shna ïa ka surok na Mynkre sha Malidor hapoh 7 sngi. Lada ym lah ban pyndep ïa ka jingmaramot hapoh kitei sngi ba la buh ïa ka shithi kin shim da kiwei ki sienjam da kaba khang ïa ka toll plaza bad ban mudui da ka ejahar pyrshah ïa ka NHAI.
Lah ban pynkynmaw ba kane ka jingbym lah ka NHAI ban pynbha ïa ka surok ka la poi shaduh sha ïingbishar Meghalaya High Court, pynban ka NHAI haduh mynta mynne ka la leh matlah ban shna ïa ka surok.
