Shillong, Naitung 27:
Saw ngut ki briew kiba la kah durkhmat bha ïalade bad kieng atiar ha kajuh ka por ki la leit ban rung jubor ha kawei ka petrol pump kaba dei jong ka Pyngrope Service Station kaba don ha Ur-Masi-U-Joh ha ka por 9:49 mynmiet jong ka 26 tarik Naitung, 2023 ban lute ïa ka pisa kaba kane ka petrol pump ka ïoh kamai baroh shisngi.
Kine ki briew kiba la kieng atiar bha ki la ïoh ban lute haduh 3 lak tam eiei ka pisa na katei ka petrol pump bad mar shu dep ïoh ïa ka pisa ki la phet bak sha ki thaiñ Smit.
Haba ïakren bad kawei ka nongtrei jong katei ka petrol pump ka la ïathuh ba ha ka miet jong ka 26 tarik Naitung ki la wan ki briew kiba riam kum ki pulit ki dang mut ba ki wan ban phah khang noh ïa ka petrol pump ba la miet ne ki mut ban wan rieh slap, hynrei mar shu poi hajan ki shu rung beit ha kamra u manager ban lute ïa ka pisa.
“Nga sngewthuh ba ki dei ki Khasi bad uwei u kren beit da ka ktien Smit namar ki la maham ban nym pyntip sha ki pulit ne pyllait ha ki social media” ka la pynpaw.
Shuh shuh ka la ïathuh ba ha katei ka miet ki don saw ngut ne ar ngut ki shynrang bad ar ngut ki kynthei namar ki mut ban khang.
“Nga la tieng shisha namar ngam pat ju ïohi kum kane ka jingjia nga la ïam nga la panmap ïa ki, hynrei kim sngap” ka la ïathuh.
Nangta, ka la ïathuh ba kane ka pisa kaba ki nongtuh ki la ïoh rah ka dei kaba kamai baroh shisngi.
Haduh ba thoh ïa kane ka khubor ki pulit kim pat ïoh kem ïa kine ki briew namar ki dang pynlong ka jingbuddien.
