Shillong, Naitung 27:
Ka Khun ki Hajar ka Hima Langrin ha ka Sngi Palei ki la pynpaw ïa ka jingsngewkhia bad ka jingsngewrem halor ka jingsynshar donbor bad ka jingsynshar kaba marwei da u Syiem ka Hima Langrin.
Haba kren sha ki lad pathai khubor ha Shillong Press Club, u Bah Edira Lyngdoh u la ong ba watla na ka liang ka KHADC ka la shimkhia ban khot ïa u Bah Nangtei Syiemïong ban wan ai jubab halor ka jinglut jingsep ka pisa ka tyngka. Hynrei ka jingwan jong ki ka long ban pynshai shuh shuh ha kaba ïadei bad ka jingong ba ka jingkynnoh pyrshah ïa u Syiem ba u la leh donbor, ka dei kaba la leh tang da ki katto katne ngut bad ba ka hima ka don hapdeng ka jingshongsuk shongsaiñ naduh ka por ba synshar u Syiem Nangtei hynrei naduh u snem 2011, ka Hima Langrin kam don jingsuk naduh ba u Syiem Nangtei u la wan synshar bad u la wanrah ïa ka Management Committee.
U Bah Edira u la ong ba ha ka por mynshwa ïa ka Hima ha kaba ïadei bad ka synshar ka khadar la pynïaid lang da u Syiem bad ka Dorbar, hynrei ha kane ka juk kaba mynta ka long kaba pynkulmar haduh katta katta ba ïa ka rukom synshar khadar lah synshar marwei da u Syiem bad kane ka ïapher bad ka riti ka dustur kaba pynïaid da ki longshwa manshwa.
“Dei halor kata ka nongrim ba ngi kum ki khun ki hajar jong ka Hima, ngi don ka jingsngewkhia bad ka jingsngewrem ba lah shu pynkit pop tang ïa kane ka Hima hynrei baroh ki jingmih, ka synshar ka khadar ka la pynlong ba la synshar marwei tang da u Syiem”, la ong u Bah Edira.
U Bah Edira u la ong ba ha ki por kiba mynshwa, ki Syiem ki la synshar ïa ka Hima tang da ka suk ka saiñ ryngkat bad ka Dorbar.
U Bah Edira u la ong ba ha u snem 2011 u Syiem u la ong ba un sa pynlong ïa ka Dorbar, hynrei ki khlem shym la pynlong satia ïa katei ka dorbar ha kaba khlem ïoh rai hapoh ka Dorbar ha shwa ban wanrah ïa ka aiñ ka Management Committee.
“Kane ka aiñ ka long pyrshah jur ha ka jingïadei jong ka Hima ka jong ngi, ngi pyrshah jur namar kam ïadei ïa ka riti ka dustur ha ka synshar hima bad halor kata ka nongrim, ngi kum ki khun ki hajar jong ka hima, ngi wan hangne ban pynshai bad ban pynsngewthuh lem ba kane ka jingleh jong u Syiem ka long kaba bakla shibun”, la ong u Bah Edira.
Nangta, u la ai khublei ruh ïa ka District Council kaba la pdiang ïa ka kaiphod jong ka Seng Samla Hima Langrin bad ha kaba ïadei ba ka pisa ka tyngka, ka District Council ka la ai por ïa u Nangtei Syiemïong uba dei u Syiem jong ka Hima Langrin ban wan jubab hapoh ka 5 sngi.
“Ngi ai khubei ïa ka jingshim bynta lem bad ïa ka jingkitkhia kum ka bor kaba dei peit ïa ka riti ka dustur bad ka jingsynshar Syiem hapoh ka Hima”, la ong u Bah Edira.
Kum ban shu kdew hangne, ki Myntri, ki Lyngdoh, ki Sordar Shnong bad ki paid ka Hima Langrin ki la leit ban ïakynduh ïa Bah PN Syiem uba dei u EM ka Elaka ha KHADC ha ka Sngi Balang. Kane ka jingïakynduh ka long ban pynsngew halor ki nongrim ba ha ki taïew kiba la dep ba ki la don ki kynhun na ka Seng Samla Hima Langrin kiba la wan ban ujor pyrshah ïa u Syiem da kaba kynnoh ba u lah synshar donbor ïa ka hima marwei. Ha ka jingïakynduh bad utei u EM, ki rangbah nongïalam napoh ka Hima Langrin ki la pynsngew sha u bad ong ba naduh ba u Bah Nangtei Syiemïong u dang long kum u Acting Syiem bad haduh kine ki sngi ym pat ju don kano-kano ka jingsynshar donbor ne leh donbor ïa ki paidbah bad ïa ki khun ki hajar ka Hima hynrei ka la long tang ka jingpynthohbria da ki nongpyrshah ïa u.
U Bah Edira u la ong ruh ba kum ki paidbah ka Hima Langrin ki kwah ba ka District Council kan weng noh ïa katei ka aiñ khnang ba ka Hima kan shongsuk shongsaiñ bad ba kan nym don kano kano ka aiñ hynrei kan ïaid beit da ka riti ka dustur kumba long ha ki por kiba mynshwa.
Namarkata, ka Khun ki Hajar ka Hima Langrin ki la dawa ruh ba dei ban weng noh ïa utei u Syiem Nangtei ryngkat bad ka aiñ kaba u la wanrah bad ban jied thymmai noh da uwei.
