Shillong, Naitung:
U Bah Damonmi Dkhar uba dei u Rangbah Shnong ka Moodok Nartiang u la dawa ba u Bah Erwin K Syiem Sutnga uba dei u nongïasaid aiñ ba paw ka jylla bad kumjuh u Chairman jong ka Joint Action Committee Border of Meghalaya (JACBoM), u dei ban ai ka jingpynshai halor ka jingpynmih kyrteng bad ka jingbyrngem byrsit jong u ïa ka kam kaba u bat kum u Rangbah Shnong.
Haba kren sha ki lad pathai khubor ha ka Sngi Ba-ar, utei u Rangbah Shnong u la ong ba u Bah Erwin u la pynmih ïa ka kyrteng Rangbah Shnong ha kawei ka jingïalang paidbah kaba la pynlong ha madan phutbol ha ka shnong Khanduli kaba hap hapoh ka Namdong Block ha ka Sngi Saitjaiñ jong ka taïew kaba la dep kaba la pynlong da ka seng kaba dang thymmai kaba la tip kum ka Namdong Block and Laskeiñ Block Border Area Peace Committee.
Utei u Rangbah Shnong u la kynnoh ba u Bah Erwin u la pynmih ïa ka kyrteng jong u kum u Rangbah Shnong da kaba u la ong ba ïa utei u Rangbah Shnong lah dei ban leit sei, leit wad bad ban ai jingsneng ïa u.
“Halor kane ka nongrim, na ka liang jong nga, nga sngew ban phah lyngba ki lad pathai khubor namar kane ka jingkren jong u, kiba bun ki nongshong shnong jong ka jylla khamtam ki nongshong shnong jong ka Ri Hynñiewtrep Hynñiewskum ki la ïohi lut ïa kane ka video kaba une u rangbah u la kren”, la ong u Bah Dkhar.
