Nongstoiñ, Naitung 27:
Ka jingkieng Umlipoi kaba don ha kawei na ki jaka jong ka surok Kynroh-Mawkaton-Nongkasen ka la dkut noh bad wanrah pat ïa ka jingsahkut jong kiwei kali kiba ïaid na katei kajuh ka surok kum ki kali kit mar rep bad ki khynnah skul kiba donkam ban ïaid man ka sngi lyngba katei surok.
Ka jingdkut thui jong katei ka jingkieng, ka dei namar ka jingïaid jong kawei ka trok ‘Dumper’ kaba la kit shyiap shaba palat u pud haduh ba kane ka jingkieng kam shym la lah shuh ban shan bad ban dkut thui. Da ka jingdkut jong kane ka jingkieng ka la pynsohsat pat ïa ki nongleit nongwan kiba jam na shiliang sha shiliang jong katei ka jingkieng.
Halor ka jingdkut katei ka jingkieng, ka Ka HYC Lai Lyngdoh Circle ha ka 27 tarik u Naitung 2023, ka la leit ban ujor sha u DC ka West Khasi Hills da kaba ka la pynpaw ruh ba ka jingkieng ka la dkut ha ka miet jong ka 26 tarik u Naitung 2023 namar ka jingïaid ka trok dumper kit shyiap kaba la kit palat pud, ha kaba katei ka trok ruh ka la sahkut hapdeng ka jingkieng kaba dkut.
Ki nongïalam ka HYC Lai Lyngdoh ki la pynpaw ba ka jingïaid jong ki trok kit palat pud na katei ka thaiñ bad ka surok, ka la pynlong ba kiba bun ki jingkieng mynta ki la synjor bad don ruh kiba la dkut syndon.
Ka HYC ka la ïathuh ba ha ka jingshisha ka seng ka la dep ban phah ruh ka shithi sha ki malik shyiap ba kim dei ba kin phah wan kit shyiap ïa ki kali heh namar ka wanrah jingma ïa ka ïaid ka ïeng ki paidbah hynrei ym shym la sngap satia.
Kumta ka HYC ka la kyntu ïa u DC ba un shimkhia ban phah maramot kyrkieh khnang ba ka ïaid ka ïeng jong ki paidbah kan nym thut.
Shuh shuh halor kane ka bynta, na ka liang u Superintendent of Police ka West Khasi Hills u la pyntip ba la khang noh shipor ïa ka jingïaid jong ki kali na Nongkasen sha Umlipoi. La bthah ruh ïa ki kali kiba na Mawkaton sharum lane ki ban leit sha Mawkaton kin ïaid noh lyngba ka surok na Kynroh.
