Nongpoh, Naitung 27:
Ki bor pulit ka Ri Bhoi mynta ka sngi ki la ïoh ban wanlam noh ïa uwei u khynnah rit uba la shah rahbor na ka shnong Umling sha ki bynta jong ka Nagaon District ka jylla Assam. U ne u khynnah rit u dei uba la shah rah bor ha ki ar ngut ki briew ki bym lah satia ban tip ha kine khyndiat sngi ba la dep.
La ïoh jingtip ba utei u khynnah rit, uba la lait na ka tyrsim jong kitei ki nongrahbor, u la ïathuh ba kitei ki nongrah bor ki la thmu ban pynïap ïa u da kaba pynhap nalor jingkieng, hynrei namar ka jingbun jong ki briew kiba ïaid ba ïeng, kitei ki runar kim ïoh lad satia ban leh ïa katei kam pyntriem.
Nalor kata, utei u khynnah u la ïathuh ruh ba kitei u nongrahbor ki la ksih ïa u kat haduh ba un da ïapler. Hadien katto katne por ba u la kyndit bynriew biang, u la ïoh lad ban phet krad na ka kti jong kitei ki runar kiba la rah bor ïa u. Na ka liang utei u khynnah u la phla ruh ba u ithuh ïa uwei na kitei ki nongrahbor ba la khot kum u ‘Bablu’.
Kumta na ka liang u Superintendent of Police ka Ri Bhoi, u Giri Prasad u la pyntip ba halor kane ka jingjia, la ujor ïa ka ejahar ha Ri Bhoi naduh ka sngi ba utei u khynnah rit u la jah, bad ïathuh ba mynta ka sngi, ka kynhun jong ki Pulit ka Ri Bhoi ki la ïoh ruh ban wanlam ïa utei u khynnah na Morigoan bad aiti pat sha ki bahaïing ki jong u kiba don ha ka shnong Umling.
Utei u heh pulit ka Ri Bhoi u la ïathuh ruh ba ka jingtohkit halor kane ka jingjia ka dang ïaid shakhmat khamtam ban ïoh kem ïa ki runar kiba donkti.
