Shillong, Naitung 27:
Ka jingjyllei u drok ha Shillong ka daw ka dei namar ba la bun palat kiba la kyrni ha une u jingdih basniew kat haduh ba don kiba pynlut hynriew hajar tyngka shisien tang ban dih ïa u drok. Kane ka dei ka jingphla kito kiba la ngop ha u drok haba ki wan ban shah ïasyllok ha u Pastor David Jamir kaba don ha Umdihar, Nongpoh, Ri Bhoi District.
Haba ïakren kyrpang bad u Pastor Jamir uba la seng ïa kane ka jaka ïasyllok ban pynkylla kaba mut ïa ki briew kiba la ngop ha ki jingdih basniew kaba ha Umdihar u la ïathuh ba ka jingjyllei u drok ha Shillong bad kiwei ki bynta jong ka jylla ka dei namar ba la bun palat kiba la kyrni.
U la ïathuh ba don kiba la pynlut T.1500 shisngi, don kiba la pynlut haduh T.6000 shisngi tang ban hun ka met namar ba la kyrni palat u drok.
Kumta u la ïathuh haba la bun kiba la kyrni, ka jingwad ïa u drok ruh ka bun bha. Dei na kata ka daw kan sa jyllei u drok hapoh ka jylla.
U la ïathuh biang ba u drok u wan na ki thaiñ Myanmar, Imphal, Mizoram ban shalan shaduh Shillong.
Shuh shuh u la ïathuh ba kito kiba la kyrni kim hun shuh tang ban sma na u khmut, hynrei ki la hap ban shu injek ïalade ban hun ka met.
“Shisien ba la donkam pisa haduh 6000 tyngka shisien kin ïoh pisa shuh naei, ha kaba khatduh hap ban shu tuh, kat haduh ba ïa ki tiar ki tar ha ïing ki tuh lut, ki jaiñ sem ki slipar jong ka kmie ki bahaïing ki la tuh lut” u la ïathuh.
U Pastor Jamir u la ïathuh ba kito kiba la kyrni lada kim ïoh ïa u drok ki kyrthat, kim ïohthiah baroh shimiet, ki shu kwah ban kynroi briew ki kwah ban hylla bad lada kim ïoh ïa u drok ka jingmut jong ki ka long beit ban shu pynïap ïalade ban ïa kaba im ha kane ka pyrthei.
“Nga isynei palat ïa kito ki rangbah kiba la ngop ha u drok, ka kmie ka hap ban kit marwei ïa ka ïing ka sem, ki khun ki lehraiñ haba ki leit sha skul, sha jaka bylla ne sha ïaid sha shnong sha thaw lada u kpa u poi ban sah ha jaka ïasyllok” u la pynpaw.
Shuh shuh u Pastor Jamir u la pynpaw ba ka jingpoi sha ka jingdih basniew ka dei namar ki samla kiba la dep jingpule ki khmih lynti ban ïoh kam, hynrei ki shu shong ïing. Dei ha kum kane ka por ba ki shong marwei u soitan u ïalam sha ka jingpynshoi namar ïa u briew uba bunkam ka jingpynshoi ka duna bha ban ïalam sha ka jingsniew.
Ha kajuh ka por u la ai jingmut ïa ka sorkar ban rat dyngkhong ïa u drok ka long ban ïatreilang ki pulit, ki dorbar shnong, ki senglongkmie bad ki jaka ba sumar ia kine kiba la ngop dih drok namar lada ki shnong ki ïoh kem ki dei ban wanrah sha jaka ai jingïasyllok ym ban shu sneng ban pyllait noh.
U la ong biang ïa u nongpang haba u pang dei ban ïalam hakhmat ki doktor ban ai dawai, ka long kumjuh ïa uba ngop ha u drok lada ïoh kem dei ban rah sha jaka ïasyllok ban pynjem ïa u bad lada u leh biang ïalam biang namar ban set patok ïa kiba dih drok lada um ïoh drok ki pulit ruh ki jynjar namar u kyrthat ha patok.
