Shillong, Naitung 27:
Ka Sorkar Jylla lyngba ka tnat PWD (Roads) ryngkat bad ka National Highway Infrastructure Development Corporation Ltd (NHIDCL) jong ka Sorkar Pdeng ka la mynjur ïa ka laiñ thymmai ban pynïaid ïa ka Pynursla Bypass kaba hap hapoh ka Package-3 jong ka surokbah Shillong-Tamail kaba dang ïaid ban pyntrei da ki konpani ban shna pynheh ïa kane ka surok kaba la mang lyngba ka Japan International Cooperation Agency (JICA).
U Symbud Myntri Rangbah uba peit ïa ka tnat tnat shna surok ha Jylla, u Bah Prestone Tynsong u la ïathuh ba ma u lem bad ki ophisar bad ki briew ka NHIDCL la ïakren halor ka projek shna surok na Shillong sha Tamabil ha kaba la mynjur ruh ïa ka laiñ thymmai ban pynïaid ïa ka Pynursla Bypass kaba hap hapoh ka Package-3.
Haba kylli, u la ïathuh ba ka laiñ ban ïaid ka Pynursla Bypass ka don ïa ka jingjrong kaba long 8 km – 10 km.
U la ïathuh ruh ba ka don ruh ka bynta jong ka Mawshun Bypass kaba shen yn la lah ban pynbeit noh kaba ka jingkongsan ka long 500 mitar haduh 600 mitar.
Halor ka jingslem ka projek ban dep, u Bah Prestone u la ong ba ki don bun ki daw kiba pynlong ban shimpor naduh ka jinglong jingman ka rukom shim jaka ha kaba ki don kiba kloi ban ai jaka bad ki don kiba artatien ban ai jaka ha kaba ka Sorkar ryngkat ki bor district hap ban pynsngewthuh bunsien bad pynkohnguh ba kin ai jaka bad yn sa lah ban pynbeit ban shna ïa ki projek.
Halor ka jingsniew palat ki bynta jong ka surok kynthup ki bynta na Pynursla sharum, u Bah Prestone u la ong ba ïa kane ruh la dep ïakren bad mynjur ba ka NHIDCL kan maramot noh ïa ki bynta jong ka surok kiba la sniew palat.
