Shillong, Naitung 27:
U MLA ka North Shillong konstitwensi, u Bah Adelbert Nongrum, ha ka Sngi Palei u la pynpaw ïa ka jingsngew lyngngoh ba kumno ka sorkar Meghalaya ka la pyntreikam da ka ‘Roster System’ jong ka ‘Job Reservation Policy’ ban jied ïa ki samla ban leit pule doktor, doktor bniat, bad kiwei-kiwei jong u snem 2023-24.
Ha u kyrwoh khubor, u Bah Adelbert u la ong, “Nga la ïoh pdiang ïa ki kyrteng jong ki samla ki ban leit pule MBBS, BDS, BHMS, BASLP, BUMS & B.Sc Nursing katkum ka ‘quota’ na ka bynta ka jylla jong u snem 2023-24.”
U la ong ba katkum ka thup kyrteng, la jied ïa ki samla ban leit pule ha ki lai bynta – Open Category, Khasi Jaiñtia Category bad Garo Category. La buh ïa ki kyrteng jong kine ki samla katkum ka jingïoh ‘marks’ jong ki ha ka eksamin NEET UG 2023, u la bynrap.
U MLA ka North Shillong u la ong ruh ba ha ka Open Category, ki don 30 tylli ki kyrteng katba ha ka thup jong ki Khasi Jaiñtia bad Garo, ki don mar 150 tylli ki kyrteng.
“Ka jingkylli banyngkong kaba nga don ka long ba kumno ïa kane ka Quota la pyntreikam lane pynïaid ha kajuh ka rukom kumba long ka Roster System namar ngi tip shai ba ka Roster System kam treikam na ka bynta kiba leit pule, bad ïa kane ruh la pyntip sha ki lad pathai khubor da u Myntri Rangbah,” la ong u Bah Adelbert.
Ha kajuh ka por u la ong ba dang shen, u la ïoh jingtip ba ka la don kata ka byrta lane ka ‘Office Memorandum’ kaba ha ka 13 tarik Jymmang, 2022 ba la pynmih da ka tnat ka koit ka khiah, sorkar Meghalaya, bad ha kata ka byrta la batai kumno ban jied ïa ki samla ban leit pule doktor MBBS.
Ha kane ka byrta, la ong ba ka jingjied kan long da kaba bud beit thik ïa ka State Reservation Policy lane ka kpait saiiñ kam kaba ïadei bad ka jingthung kam thung jam ha ki shlem treikam ka sorkar jylla.
Nalorkata, u Bah Adelbert u la buh jingkylli ïa ka sorkar ba hapoh ka aiñ ne kyndon aïu la pynwan dur ïa katei ka rukom jied ïa ki samla pule namar haduh mynta, ym pat don kano-kano ka aiñ ha ka jylla ha kaba ïadei bad kane ka bynta.
“Ha kaba khatduh, nga kwah ban kylli ba kumno la pyndonkam da ka State Reservation Policy ha ka jingjied ïa ki samla ban leit pule namar kane ka dei beit thik tang na ka bynta ka jingthung kam thung jam,” la bynrap u MLA ka North Shillong.
