Shillong, Naitung 27:
U Lat ka jylla, u Phagu Chauhan, ha ka Sngi Palei u la ïakynduh ïa ka Deputy Commissioner ka East Khasi Hills, ka Kong R.M. Kurbah ryngkat bad u Superintendent of Police ka East Khasi Hills, u Bah Sylvester Nongtnger, ha ka ïing sah jong u ha Raj Bhavan.
Kane ka long katkum u kyrwoh ba la phah na Raj Bhavan bad la ong ba ha kane ka jingïakynduh, kitei ki heh jong ka distrik ki la pyntip sha u Lat ha kaba ïadei bad ka jinglong jingman ka shongsuk shongsaiñ ha ka distrik baroh kawei.
Ka jingleit jong ka DC bad u SP sha Raj Bhavan mynta ka sngi ka long hadien ba ka distrik ka la sakhi ïa ki jingjia kum ka jingjia ha ka Lah Sngi U Blei ha Mahadev Khola ha kaba ka la don ka jingwan thombor na ka daw jong ka jingïakajia bad ka jingshah thang ka kali pulit ha thanat Laitumkhrah hadien ba la mih ka jingïakynad hapdeng ar kynhun. Kine ki dei tang artylli ki jingjia kiba kham kongsan kiba la paw ha kine ki khyndiat sngi bad taïew.
Ka long ka sien banyngkong naduh ba u Chauhan u la wan ban shimti kum u Lat mynta u snem ba un ïakynduh kyrpang ïa ki heh kano-kano ka distrik ban ïoh jingtip na ki halor ka jinglong jingman ka shongsuk shongsaiñ.
