Shillong, Naitung:
Ka Seng Samla Mawlai Pyllun (SSMP) ka la leit ban buddien na ka Sorkar Jylla ha ka Sngi Balang na ka bynta ban tip ïa ki sienjam kiba ka tnat pynroi sor lem bad ka Shillong Municipal Board ka la shim ban pynkynriah noh ïa ka jaka theh jaboh jabaiñ ha Marten bad ki kor ki bor kiba ka Sorkar ka la kular ban leh ha Marten na ka bynta ban pynkylla ïa ka jaboh jabaiñ sha ka spah.
Hadien ka jingïakynduh ïa u Myntri pynroi sor, u Bah Sniawbhalang Dhar, na ka liang u General Secretary ka SSMP, u Bah Samran Syiem u la ïathuh sha ki lad pathai khubor ba ha kane ka jingïakynduh ban buddien ïa ki sienjam kiba ka Sorkar ka dei ban shim, ka seng ka buh jingkylli ïa u Myntri halor ka jingpyntrei ïa ki kor kiba lah ban pynkylla ïa ka jaboh jabaiñ sha ka spah bad kwah ban sngewthuh kumno ka kam ka la ïaid naduh ka jingpynkynriah ïa marten bad ban pynduna ïa ka jingsma kaba ju mih na kane ka jaka bret jaboh jabaiñ.
Hynrei haduh mynta ym pat don ka jingtip kaba shai kumno yn pynkynriah ïa ka marten shawei pat, bad hangno ka jaka ka don ban pynlong kum ka jaka pyllang ïa ki jaboh jabaiñ.
U Bah Samran u la ong ba u Symbud Myntri Rangbah u la batai ba ka la don kawei ka kompani ha marten kaba pynkhuid ïa ka jaboh jabaiñ bad pynkylla ïa ka jaboh jabaiñ sha ka spah, bad ka Shillong Municipal Board ruh ka la shim ki lad ki lynti ban pynkit ïa ki plastik sha ki karkhana ban pynduna ïa ka jinglang ki jaboh jabaiñ ha Marten bad ban pynduna ïa ka jingsumar.
U la ong kumba ka long mynta, wat la ka jingsma ka dang mih na marten hynrei ka la kham duna ym kum ha ki por ba la leit ba ka jingsma ka jur palat.
Halor ka jingpynkynriah noh ïa ka Marten na Mawlai Mawïong, ki nongïalam ka SSMP ki la ong ba u Symbud Myntri Rangbah u la pyntip ba kane kan sa urlong bad ka kam ka dang ïaid shakhmat.
“Kane ka kam ka shimpor bad ngi kwah ba ka Sorkar kan leh kloi noh namar ka marten kam long shuh ban pyndonkam,” u la ong.
Hynrei haduh mynta ym pat tip satia sha kano ka jaka ka Sorkar kan pynkynriah ïa jaka pyllang jaboh namarba ka Marten ha Mawlai Mawïong ka dei kaba la pyllang jaboh la kumba 85 snem naduh u snem 1938 bad kane ka jaka kam long shuh kaba biang ban bret jaboh.
