Tura, Naitung 27:
Ki dor distrik ka West Garo Hills ki la rai ban weng noh ïa ka korphiw miet na sor Tura naduh ka step jong ka Sngi Thohdieng.
Ha ka hukum ba la pynmih ha ka Sngi Palei, u District Magistrate, Jagdish Chelani, u la ong ba ïa ka korphiw ba la pyntreikam hapoh ka kyndon 144 CrPC yn weng noh naduh ka por 5 baje mynstep jong ka Sngi Thohdieng namar ka jinglong jingman ha Tura ka la jai-jai.
U Chelani u la ong ba katkum ki kaiphod, la pyni ba kim don shuh kino-kino ki briew kiba lah ban pynthut ïa ka shongsuk shongsaiñ ha Tura.
Ïa ka korphiw ha baroh kawei ka sor Tura la pyntreikam ha ka miet jong ka Lah Sngi U Blei hadien ba ka la mih ka jingshah kawang maw ka shlem treikam u Myntri Rangbah, Conrad K Sangma, ha Dakopgre katba ka jingïalang ka dang ïaid hapdeng jong u bad ki seng kiba pyrshah ïa ka Reservation Roster bad kiba dawa ban pynlong ïa ka sor Tura kum ka nongbah ka Meghalaya ha ka por tlang.
Ha kajuh ka por, la ai hukum ban weng noh ïa ki BSF kiba la don bynta ban pahara ïa ka sor Tura.
