Shillong, Naitung 27:
U Symbud Myntri Rangbah uba peit ïa ka tnat pulit, u Bah Prestone Tynsong u la ong ba ka long ka man ka suk ka saiñ ka long kaba biang ha ka Jylla kynthup ha sor Tura ha kaba la mih ka huri-hura ban thombor ïa ka jaka pynlong jingïalang u Myntri Rangbah, u Conrad K Sangma ha kaba ïada ruh ïa ka jingdawa ban weng ïa u DGP bad SP ka West Garo Hills da kaba ong ba wat lada ki dawa, hynrei kiba shahkem bun ki dei na ki seng saiñ pyrthei.
Haba ki nongthoh khubor ki buh jingkylli ïa u Bah Prestone halor ki jingjia kiba pynthut ïa ka suk ka saiñ ha Jylla kynthup ha Tura, bad ka jingdawa ka TMC ban weng ïa u DGP bad SP da kynnoh ba ki buh jingma ïa ka jingim u Myntri Rangbah ka Jylla, u Bah Prestone u la ong ba ka jingkem ïa kiba donkti ka la ïaid bad ka aiñ kan leh ïa kaba donkam.
“Phi dawa ban weng (DGP, SP) bad phi lah ban dawa, hynrei ka jingshisha ka long ba kito kiba la shahkem ki dei na ki seng saiñ pyrthei. Ka dei ka jingjia kaba la leh ban pynlong saiñ hima, tangba ngam kwah ban ong than namar ka jingtohkit ka dang ïaid bad ka aiñ kan leh katkum dei ban leh. Ki pulit ki la leh la kajong ka kamram bad nga ai ka jingïaroh ïa ki. Nga kyrpad ruh ïa ki pulit ban nang lehbha shuh shuh ban tehlakam ïa ki kam kiba thmu ban pynthut ïa ka suk ka saiñ,” la ong u Bah Prestone.
U la ong ruh ba lada ïakren ïa ka jingthmu ban pynjulor da kiba la thmu ban pynkulmar, ka jingduh ka dei hi ïa ki paidbah, bad ym lah ban shu leh ha ka kyrteng ban pynsniew ïa ka jinglong jingman tang na ka bynta ka jingmyntoi jong ki bad ki pulit bad ka Sorkar ki don hangne ban pynneh ïa ka suk ka saiñ ha Jylla.
“Ngi donkam ban kham smat ha baroh ki liang, bad ngin leh lut ïa kata na ka bynta ka suk ka saiñ. Ki pulit ki dang tohkit bad lehse kan don shuh ka jingkem ïa kito kiba donkti bad ai ba kin dep shwa ki bynta kiba dei ban leh. Ym lah ban shu pynkut noh la ka dei kaba la don kiba thmu lypa hashwa ne kaba thmu hadien, hynrei ka aiñ ka dei hi ka aiñ bad ki pulit ki don hangne ban shakri ïa ki paid nongshong shnong ka Jylla ladon mih jingeh ne ym mih jingeh ki trei beit ban pyndep ïa ka kam ba ki dei ban pyndep ban ai jingshngaiñ ïa ki paidbah,” la bynrap u Symbud Myntri Rangbah.
Kumta namarba kito kiba shahkem ki dei kiba don ha ka seng saiñ pyrthei A lane B, ka paw ba ka jingpynkulmar ka dei ka mat saiñ pyrthei jong ki katto katne, tangba ai ba ka jingtohkit kan dep lut shwa katkum ki kyndon.
Halor ka jingkynthoh u Myntri Rangbah barim u Dr Mukul Sangma ba ki pulit ki pyrshang ban trei na ka bynta ki heh saiñ pyrthei kiba don ha ka bor synshar, u Bah Prestone u la buh jingkylli kylla, hato u Dr Mukul u mut ban ong ba ha ka por ba u long kum u Myntri Rangbah ka Jylla u la pyndonkam ïa ki pulit ban leh kumta?
“Ngim don hangne ban ïada ïalade hynrei ban ïada ïa ki paidbah ka Jylla,” u la ong.
Haba kylli ba ka don ka jingbymleram ka tnat pulit kaba pynlong ban jia kat kato ka jingjia ha Tura, u Bah Prestone um shym la pdiang ba ka dei ka jingbymlerkam, hynrei u la ong ba donkam ban kham pynbha shuh shuh ïa ka jingtreikam namarba kino kino ki kam runar ne haba jia ka tuh ka thiem bad kino kino ki jingjia kiba pynthut ïa ka suk ka saiñ la ka dei ha shnong ne nongbah, kumno yn tip lypa bad kumno kan jia.
“Kumta ngi hap ban kham pynbha shuh shuh khnang ba ngin lah ban tehlakam ïa kino-kino ki jingjia,” la ong u Bah Prestone.
