Shillong, Naitung 27:
Ka Central Puja Committee (CPC) ha Meghalaya ka la pynpaw ka jingsngewkhia bad diaw halor ka jingjia thombor ha Mahadev Khola ha ka 24 tarik mynta u bnai bad ka ong ba kum kane ka jingjia, kam dei satia kaba ju jia.
Ha u kyrwoh, ka CPC lyngba u nongïalam u JL Da, ka la ong ba kum kane ka jingjia kam dei satia kaba ju jia namar ka Jylla Meghalaya ka dei kaba la tip kum ka ka Jylla kaba don ka jingsngewtynnad lang bad long paralok.
Haba rai ban pynrem ïa ka jingjia, ka CPC ka kyrpad ruh ïa ka Sorkar ban buh ki nongpahara ha ki jaka mane namarba ki don beit kiba ju leit jngoh ïa ki jaka mane baroh shisnem ban pyndep ïa ka jingngeit niam bad lehniam jong ki.
Ka jingïalang ka CPC kaba long ha ka 26 tarik mynta u bnai ka la kyrpad ruh ïa baroh ki jaka mane ki riewngeit Hindu ban pyndait ka kor CCTV ha ki jaka mane shimet jong ki ruh na ka bynta ka jingpeitngor bad ban khanglad ïa kum kine ki jingjia hadien habud kiba lah ban pynmih da kito kiba pyrshah ïa ka suk ka saiñ ha ka imlang sahlang.
