Shillong, Naitung 27:
Ka jylla Meghalaya ka la ïaid sted shakhmat ban long ka jaka pdeng jong ka jingkhaïi ïa u drok ym shuh tang ka lynti ban ïaid lyngba. Kane ka la wanrah ruh ïa ka jingngop jong kiba bun ki khynnah samla. Kumba ka long mynta, ka jinglong jingman hapoh ka jylla namar u drok ka la nang shyrkhei.
Ha kaba ïadei bad ka jingjyllei jong u drok, na ka liang u Director General of Police (DGP) ka Meghalaya u Dr LR Bishnoi haba kren bad u nongthoh khubor, u la ong ba u drok u la pyngngop shi katdei eh ïa ki khynnah samla bad ruh ban pynsniew ruh ïa ka imlang sahlang bad ktah ïa ka shongsuk shongsaiñ.
U DGP u la ong ba ka pisa ka dei kawei na ki daw ba u drok u la ïoh ban rung suk, namar kiba bun ki ngop na ka daw ka pisa.
U Dr LR Bishnoi, u la ïathuh ba ha ka jingïakhun bad pyrshang jong ki pulit ban rat dyngkhong ïa u drok, tang ha kine ki shi snem, ki pulit ki la lah ban pynrung kyrteng palat 130 tylli ki case, kaba kham heh haba ïanujor bad kiwei ki snem kiba la leit.
U la ong ba ka jinglong jingman mynta ka long kaba sniew ha Meghalaya namar mynta ka Meghalaya kam long shuh tang ka lynti ban pynïaid ïa u drok sha kiwei pat ki jylla jong ka ri, hynrei ka la kylla long ka jaka pdeng jong ka jingkhaïi drok.
Wat la ki nongkhaïi ki la ïoh lad ban pynrung suk ïa u drok shapoh ka jylla, hynrei kam long pat kaba suk ïa ki ban pynïaid shakhmat, na ka jingpeitngor jong ka tnat pulit kaba la ïakhun bad pyrshang ban rat dyngkhong ïa u drok bad kiwei ki jingdih buaid napoh ka jylla.
U la pyntip ba tang ha kine ki shisnem, ki pulit ki la ïoh ban kurup haduh 14 kilo u drok ‘Heroin’, 400 tylli ki mobile phone, 200 tylli ki kali, 12 hajar kilo u ganja bad haduh 400 tam kiba la shah kem.
Haba kylli halor kiba la shah kem, u DGP u la ïathuh ba ki don kiba dang don hapoh ka patok, don kiba la lait jamin bad don ruh kito kiba la lait, kiba dang pyrshang ban sdang biang ïa kane ka kam, bad na ka liang ka tnat pulit ruh ka dang peitngor bha ban khanglad.
Haba kylli pat hato aïu ka tnat pulit ka leh ïa u drok ba la ïoh ban kurup, u DGP u la pyntip ba ïa u drok ba la ïoh kurup dei ban pynjot ne thang noh hapoh ki 30 sngi bad kata ruh ynda la dep ban pynbit pynbiang lut ki kaiphod bad pyndep ka ‘chargesheet’ bad hadien kata ynda la ai jingbit ka ïingkashari, hynrei teng teng ka shimpor namar slem ban ïoh kaiphod bad pynkhreh ïa ka chargesheet.
Ka jingpynjot ne thang ïa u drok ruh ka ïaid bad long katkum ki kyndon bad namarkata, ha man la ki district la don ki Drugs Disposal Committee bad ynda la ai jingbit ka ïingkashari, ka dei pat ka kamram jong kane ka committee ban leit thang bad ïa ka jingthang ruh la leh ha ki jaka kiba la dep ban ithuh lypa, kiba long ha ki karkhana dewbilat bad ka sien kaba khatduh ba la thang, ka la long ha Khliehriat, East Jaiñtia Hills.
U DGP u la pyntip ruh ba ki saw tylli ki district kiba u drok u jyllei bha ki long ka East bad West Jaiñtia Hills, East Khasi Hills bad Ri-Bhoi District namar ki don ha ka surok bah, kaba dei ka lynti ïaid jong u drok uba wan poi na Myanmar bad ïaid lyngba na kane ka jylla sha kiwei pat ki bynta jong ka ri.
Na ka liang jong u DGP u la buh ka jingkyrpad sha ki khynnah samla ba kin ïaleh ban kiar na u drok, namar u dei u jingdih uba shisien la ngop la eh ban lait. Kane ym tang ba kan ktah ïa ka koit ka khiah, ka met ka phad, hynrei wat ïa ka shnong ka thaw, ka imlang sahlang bad ka ïing ka sem.
