Tura, Naitung 27:
Lai sngi hadien ka jingjia ha Tura ha kaba ka la don ka jingkawang maw, u MDC ka Tura na ka seng BJP, u Bernard N Marak, ha ka Sngi Palei u la kam ba ka jingjrong bad jingshimpor ka jingïalang kaba la neh lai kynta bad ka jingbym biang ka rukom ai jingtip sha ki paidbah kiba ap shabar ha kaba ïadei bad kaei kaba la ïakren ha ka jingïalang hapdeng u Myntri Rangbah, Conrad K Sangma, bad ki kynhun seng, ki dei ki daw bakongsan kiba la ïalam sha ka jingshah kawang maw ka shlem treikam u Myntri Rangbah.
“U Myntri Rangbah u la kyntait ïa ka mat kaba kongsan bad kata ka dei ka jingdawa ban pynlong ïa ka Tura kum ka nongbah ka Meghalaya ha ka por tlang, bad u la pyni sha ka pyrthei ba u la shah pynkylla sohpdung ha ki kynhun Garo. Ka jingkem naphang ïa ki briew ka dei ka jingïasylla pyrshah ïa kito kiba ju kren pyrshah ïa ka jingbamsap bamngem ha Ri-Lum Garo. Da kaba pyni bakla ba u la shah thombor ha ki Garo, u Myntri Rangbah u la shet kylla ïa ka jaitbynriew kaba la pynlong Syiem ïa u,” la ong u Bernard ha u kyrwoh khubor.
Une u MDC u la ong ba ki la don tang katto katne ngut ki briew kiba la thaw jingkulmar ha kato ka sngi, bad kan ym don jingeh ban kem ïa kita na kato hi ka jaka.
“Mynta, ka pyrthei baroh kawei ka ïohi ba ki Garo ki dei ki briew ki bym pat shai bad kiba long riewkhlaw. Kane ka long kaba sngewsih namar ngi la kylla long ka jaitbynriew kaba ieid ïa ka jingsuk,” la bynrap u Bernard.
Shuh shuh u la ong ba balei ka la shimpor haduh lai kynta tang ban ong ‘hooid’ ne ‘em’ halor ki jingdawa jong ka seng. U la ban biang ba ka jingshimpor palat jong ka jingïalang ka dei ka daw bah kaba la wanrah ïa ka jingïakynad.
“Da kaba shim kabu na katei ka jingjia ba la leh da ki katto katne ngut, mynta ka la don ka jingthwet sa ïa ki briew kiba don ha kiwei pat ki seng saiñpyrthei. Ki seng saiñpyrthei ki khlem ïadon bynta satia ha kato ka jingïakhih, hynrei ïa kiba la shah kem pat la pyni ba ki dei ki dkhot ka BJP lane TMC. Ka long kaba sngewsih ba wat kito kiba khlem don bynta ha ka jingïalang, ki la shah kem,” la ong u MDC.
Nalorkata, u Bernard u la kam ba baroh kito ki nongshong shnong kiba ju pan jingtip lyngba ka RTI pyrshah ïa ka sorkar lane kiba la pynpaw ïa ki jingduna ha ka jingtreikam ka sorkar lane kiba la kren pyrshah ïa ki kam ba sniew ki la shah jer kyrteng kum kita ki nongpynshit ne nongai ding ha kaba ïadei bad katei ka jingjia kawang maw.
“Ka jingkam ba ka la don ka jingpyrshang ban leh sniew ïa u Myntri Rangbah ka long kaba bakla bad ïa kane dei ban kynnoh ïa ki pulit namar ki khlem lah ban pynbiang jingïada. U Myntri Rangbah u dei ban sngewnguh ïa kito ki paidbah namar ki la pynlong Syiem ïa u bad ki la khmih lynti ba un ai jingkular sha ki ba kin ym shah shet kylla kumba la leh da kiwei pat ki nongïalam ha ki snem ba mynshwa. Hynrei u khlem lah ban sngewthuh ïa ka jingsngew jong ki paidbah kiba la ïalum hangto,” la kynnoh u Bernard.
Shuh shuh u la ong ba ka jingkem naphang ïa ki briew ka pyni ïa ka jingbym long shngaiñ jong ki nongïalam saiñpyrthei namar ki paidbah ki la kyndit bynriew bad ki la pyni ïa ka sur pyrshah ïa ki nongïalam kiba ym shym la leh ïa kaba biang tam na ka bynta ka Ri-Lum Garo.
U Bernard u la ong ba ha ka Lah Sngi U Blei ki paidbah ki la wan ban sngap ïa ka jingai jingkular na ka liang u Myntri Rangbah halor ki mat ba la dawa, hynrei hadien ba ka jingïalang ka la ïaid la lai kynta bad kam shym la don ka jingkut, ki briew ki la sdang ban lynga bad pynpaw ïa ka jingbitar.
U la ong ba ïa kane lah ban ïohi lyngba ki dur khih lane ‘video’ ha kaba ki briew ki la ong ba kin ap sa tang 10 minit. “Dei ban kem ïa kito kiba la sdang ïa ka jingïakynad. Wat kynnoh lut ïa baroh ki paidbah,” u la ong.
