Shillong, Naitung 27:
U Symbud Myntri Rangbah u Bah Prestone Tynsong u la ong ba naduh la ïakut ban poi sha ka jingïakren sngewthuh, ym don kano-kano kaba mih na ka liang ka Hynñiewtrep National Liberation Council (HNLC) kaba lah ban pynthut ïa ka jingïakren, lait noh tang ka shithi thok ban dawa pisa kaba ki pulit kin wad ïa ka jingshisha.
U Bah Prestone u la ong ba naduh ba sdang ka jingïakut ban sdang ka jingïakren, ma u ruh u la ïakynduh ïa kiba mihkhmat ïa ka HNLC bad la ïakren bad ki ba ka jingïakren kan ïaid beit ban poi sha ka jinglah ban pynbeit ïa ki mat kiba yn sa rah hakhmat ban ïakren.
Haba kylli halor ka jingong ka HNLC ba katba dang ap ban pynbeit khatduh ïa ka jingïakren ki briew ki lah ban nohsynñiang sha ka HNLC, u Bah Prestone u la ong ba lada ka dei ka jingong ban nohsynñiang, kam dei ban mih kum ka shithi.
“Mynta ba ka la sdang ka bynta ban ïakren sngewthuh, nga sngew ban ong ba ka dei ban don ka jingshimkhia lang ïa kane ka kam, bad ngi dang ap ruh ban ïoh ïa ki mat kiba dei ban rah sha ka miej ïakren,” u la ong.
Haba kylli la kane ka jingmih ka shithi dawa pisa ka lah ban pynthut ïa ka jingïakren, u Bah Prestone u la ong ba hadien ba la poi sha ka jingïakut ban ïakren sngewthuh, ym don shuh kano-kano ka jingpyni kam ne khynra na baroh arliang. U la ong ba ym don ka shithi dawa pisa, hynrei lait tang kata kaba mih ka shithi thok kaba ki pulit kin wad ban pynshisha ïa kane.
Ka HNLC ha u kyrwoh khubor ka la maham ruh ïa kino kino kiba shim ïa ka kyrteng ka seng ban dawa pisa bad ka la kam ruh ba ka jingphah shithi dawa pisa ka dei ka kam ki runar.
