Shillong, Naitung 28:
Ka United Democratic Party (UDP) kan sa pynlong ïa ka General Council ha ka 12 tarik u Nailar, 2023 ha shlem treikam kaba don hajan ka Shillong College ban pynthymmai ïa ka samoi treikam u President bad kiwei ki nongkitkam.
Ha shwa ban sdang ka General Council, ka Nomination Committee jong ka UDP kan sa shong jingïalang ha ka por mynstep ban tyrwa ïa ki kyrteng jong ki nongkitkam ka ban sa pan jingmynjur pat ha ka General Council.
Haba ïakren bad u Bah Alantry Dkhar uba dei u Vice-President ka UDP u la ïathuh ba katkum ki kyndon ba la thaw ha ka seng UDP haba jied ïa ki nongkitkam kiba thymmai, ka Nomination Committee kan shong jingïalang shwa ha ka por mynshwa shi kynta shwa ba ka General Council kan sdang.
U la ïathuh ba ha ka Nomination Committee kin mihkhmat ki nongkitkam na ki district, ki nongkitkam na ki Women Wing, ki nongkitkam ka Youth Wing bad hynriew ngut ki dei ki dkhot kiba ju treikam bha ha ka seng UDP ba kin ïa pyrkhat ban tyrwa ïa ki nongkitkam kiba thymmai.
Nangta, u la ïathuh ba ha kane ka General Council yn wan mihkhmat na man ki district bad ki circle katkum ka jingbthah ki nongkitkam na District.
Shuh shuh u la pyntip ba dei tang ha ka Nomination Committee kaba ki lah ban pynkylla ïa ki nongkitkam, ki lah ban pynskhem biang ïa ujuh ne ki lah ban thung bujli da uwei bad khatduh kin sa pan jingmynjur sa ha ka General Council.
Ki khubor ki ïathuh ba haduh mynta ym pat don ba nud ban aireng ïa ka shuki President ba bat da u Bah Metbah Lyngdoh. Hynrei la sngewthuh ba ka Nomination Committee kan sa pynskhem biang ïa u Bah Metbah kum u President, katba ïa kiwei ki kam ki lah ban bujli noh katkum ka jingïaid jong ka por.
Kum ban shu pynkynmaw u Bah Metbah Lyngdoh u la shah jied kum u President bathymmai ka UDP ha ka 11 tarik Nailur, 2019 hadien ka jingkhlad noh u President barim u Dr. Donkupar Roy Lyngdoh. U la iehnoh ruh ïa ka shuki Myntri ha ka sorkar MDA-1 ban leit shimti kum u Lamphang ka ïingdorbar thawaiñ ha utei ujuh u snem ha jaka u Dr. Donkupar Roy.
Ka samoi treikam ka UDP ka long na ka bynta lai snem kaba dei ban kut ha ka 11 tarik Nailur 2022. Hynrei, namar ba ka ilekshon MLA ka dei ban long ha u snem 2023, kumta ka UDP da kawei ka jingmut ka la rai ba ki nongkitkam barim kin bteng sa shisnem kata kaba mut haduh mynta u snem.
Kumta ha shwa ban kut ka 11 tarik Nailur, 2024 ka UDP kan sa pynthymmai noh ïa ki nongkitkam ha ka 12 tarik Nailar, 2023 na ka bynta ka samoi treikam kaba lai snem.
