Shillong, Nailar 28:
Wat la ka Voice of the People Party (VPP) kam pat jied ïa ki nongkitkam jong ka Sohïong constituency, hynrei haduh mynta kiba la phah jingthoh sha u President ba rangbah ka VPP u Bah Ardent Basaïawmoit ki la don haduh lai ngut kiba pynpaw ba ki kwah tiket ban ïakhun ïa ka ilekshon MDC na Sohïong-Nongspung constituency ka ban long la shem snem.
Ha kine ki sngi la ïoh jingtip ba ki don tang ar ngut kiba la phah jingthoh sha u President ka VPP, hynrei mynta la ïoh jingtip ba u don sa uwei uba la dep phah jingthoh.
Ki khubor kiba ïajan ki ïathuh ba kine lai ngut ki kyrteng kiba la dep phah da ka jingthoh dang hap ban buhrieh shwa namar ki dang don shuh shuh ki ban dang pan tiket.
Kine lai ngut ki long uwei na ki thaiñ Wahlang, uwei na thaiñ Sohïong bad uwei na ki thaiñ Krang.
Katkum ka jingïakren bad u nongaiktien ka VPP, Bah Batskhem Myrboh ha kine ki sngi u la ïathuh ba wat la ki la don kiba la phah jingthoh sha u President ka VPP ba ki kwah tiket ban ïakhun ïa ka ilekshon MDC, hynrei ka rai kaba khatduh ka dei ka Election Committee ban sa pynbna ynda la dei ka por.
Ha kawei pat ka khubor la ïoh jingtip ba ka Congress kan pynïeng biang da u Bah S. Osborne Kharjana kum u kyrtong ha ka ilekshon MDC, wat la u khlem jop ha kane ka ilekshon MLA ba dang shu dep.
Ki khubor ki ïathuh ba haduh mynta kiba la pynkhreh ban pynïeng kyrtong ha ilekshon MDC ha Sohïong ki long ka VPP, UDP, NPP bad Congress.
