Shillong, Naitung 28:
Ka Catholic Association of Shillong ha ka 5 tarik Nailar, 2023, kan pynlong da ka ‘Silent Peace Rally’ ha nongbah kum shi bynta ban pyni ïa ka jingsngew halor ka jingïakynad bad ïaumsnam ha ka jylla Manipur kaba la neh mynta la jan lai bnai.
Ha katei ka sngi, kan don ka jingïaid paidbah na Madan Ïewrynghep sha Don Bosco Mini Stadium ha Laitumkhrah bad kane ka jingïaid kan sdang ha ka por 10 baje mynstep.
Ha ka shithi ba la thoh da u Lyngdohsad ka Jylla-Niam Bah Shillong, u Archbishop Victor Lyngdoh, sha ki para Lyngdohsad, Major Superior, Provincial, Parish Priest, Principal, Rector, Superior, Lyngdoh Niam, bad ki riewniam baroh, ha ka Sngi Thohdieng, la kyntu ïa kine baroh bad kumjuh ruh ïa ki para nongshong shnong ban ïashim bynta ha katei ka jingïalang ba la khot pynlong da ka Catholic Association.
U Archbishop u la kdew ba ha ki bnai ba la lah, baroh ki la ïa duwai na ka bynta ka jingsuk ha ka sla pyrthei bad ha ka rukom bakyrpang na ka bynta ka jylla Manipur.
U la kyntu ban bteng ïa ka jingduwai khnang ba ka jingsuk kan wanphai sha Manipur.
“Ngi la ïohi ïa ka jingleh bym hok pyrshah ïa ki kynthei, ka jingshah thang ki ïing ki sem, ka jingshah pynjulor ki jaka mane blei, ka jinghap phet shnong da ki hajar ngut ki paidbah, bad ka jingïap briew namar ka jingïaumsnam,” la ong u Archbishop. U la ong ba baroh kin hap ban ïeng na ka bynta ka jingburom ïa ki para briew.
