Shillong, Naitung 28:
Haduh 73 tylli ki kam doktor ki lait thylli ha ka hospital Sorkar Pdeng kaba don ha Mawdiangdiang, kata, ka North Eastern Indira Gandhi Regional Institute of Health and Medical Sciences (NEIGRIHMS) nalor kiwei pat ki kam kiba sah thylli.
Kane ka la paw ha ka jubab jong ka Myntri Khynnah ka Sorkar Pdeng ba dei peit ïa ka tnat ka koit ka khiah, ka Dr Bharati Pravin Pawar, haba jubab ïa ka jingkylli ba la wanrah da u MP ka Lok Sabha, u Bah Vincent H. Pala, ha ka Dorbar Lyiur ha ka Sngi Thohdieng.
Katkum ka jubab jong ka Myntri, la ïathuh ba la bhah 146 tylli na ka bynta ki kam hikai, bad na kine, 62 tylli ki dei kiba lait thylli.
Ha kajuh ka rukom, la bhah 69 tylli ki kam na ka bynta ka Group A bad kiba lait thylli ki long 23 tylli. Na ka bynta ka Group B, la bhah 918 tylli, bad kiba lait thylli ki long 159 tylli. Na ka bynta ka Group C, ki kam ba la bhah ki long 339 tylli bad kiba lait ki don 74 tylli.
Na ka bynta ka kam Group C MTS, la bhah 58 tylli bad dei hangne ba ym don satia kano-kano ka kam kaba lait thylli.
Kaba kham sngewbynñiaw ka long ba na ki 107 tylli ki kam Senior Resident Doctor, kiba lait thylli ki long 52 tylli, bad na ka bynta ki 90 tylli ki kam Junior Resident Doctor, kiba lait thylli ki long 21 tylli.
Kine ki jingkheiñ jingdiah jong ki kam kiba la mang bad kiba lait thylli ki dei haduh ka 21 tarik Naitung, 2023.
Haba la kheiñ kyllum, baroh ki kam kiba lait thylli ha NEIGRIHMS ki long 391 tylli.
Halor ka jingkylli jong u Bah Pala, ka Myntri ka la ïathuh ba ka Sorkar Pdeng kam don jingthmu satia ban kyntiew ïa ka NEIGRIHMS sha ka kyrdan jong ka All India Institute of Medical Sciences (AIIMS).
Halor ka jingdon ki nongwan shim dawai lane OPD, ka Myntri ka la ïathuh ba ha ka shi snem, ym duna ïa ka 3 lak ngut ki nongpang ki ju wan ban shim dawai na NEIGRIHMS.
Halor ka jingdon jong ki nongthiah pang lane IPD, ka la ong ba ha ka shi snem, ym duna ïa ka 16,000 ngut ki briew ki ju wan thiah pang ha katei ka hospital.
Shuh shuh halor ka jingkylli katno ngut ki nongtrei ‘Contractual’ ki don ha NEIGRIHMS, ka Myntri ka la jubab ba haduh mynta u don tang uwei u ‘Consultant’ uba trei ‘Contractual’. Ha kajuh ka por, ka la jubab ba ki don ki nongtrei kiba la pynrung kam lyngba ka ‘Outsource Basis’.
