London:
Ka kynhun rwai KISS ka la ai khublei khatduh eh ia ki nongkyrshan jong ka hadien ba kane ka kynhun ka la pynkut ia ka ‘End of the Road Tour’ ha London ha kaba hadien kane, ka KISS kan ym mih pyrthei shuh.
Hadien 46 snem jong ka jingleit rwai kylleng bad ka jingshim bynta ha kylleng ki Stadium jong ki ri ka pyrthei khatduh eh ka KISS ka la ai khublei ia ki nongkyrshan kiba ju ai mynsiem ia kane ka kynhun na ka por sha ka por. Ha ka jingwan rwai ha London ka KISS ka la rwai ia ki katto katne ki jingrwai ba paw bha jong ka, kiba kynthup ka ‘Love Gun’, ‘Black Diamond’, ‘Detroit Rock City’, ‘Beth’, ‘God of Thun der’, ‘I was made Loving You’, ‘Strutter’, ‘I Stole Your Love’, ‘100,000 Years’ bad ‘Shout it Out Loud’.
Ha ka jingwan shim bynta khatduh eh jong kane ka kynhun ki nongwan peitkai kila pyndap ia ki jaka bad iarwai lang ruh bad ka. Ha ka jingleit rwai kylleng ki ri kiba kane ka kynhun ka la shim bynta ki kynthup ka US, Canada, Germany, the UK, Denmark, the Netherlands, Japan, Australia, Mexico, Russia, Poland, Ukraine, the UAE, Brazil, Chile, Argentina, South Africa, El Salvador, Norway, Finland bad kiwei kiwei. Ka KISS ka dei ka kynhun rwai kaba la slem bha bad ka riam ka beit jong ki dkhot kane ka kynhun ka dei kawei kaba ki nongpeitkai ki ju shah khring bha naba ka pher na kiwei kiwei.
Ha kajuh ka por kane ka kynhun ka la lah ban pyniaid iew haduh 100 million record.
