Shillong, Naitung 28:
Ka jingthmu ka Sorkar Jylla ban kham pynduna ïa ka dheng kali ha Shillong lehse kan dang shimpor, hynrei ki don pat katto katne ki projek kiba la nang pynwandur ban pyntreikam kiba kynthup ïa ka Flyover bad Skywalk nalor ki jaka ïeng kali bad jingtei ïa ka Secretariat thymmai ha New Shillong Township ki ban sa ïarap weng ïa ka jingeh namar ka jingkhapngiah bad ka dheng kali.
Ïa kane la ïathuh da u Myntri Rangbah u Conrad K Sangma haba kren sha ki lad pathai khubor ha ka sngi Thohdieng.
U Conrad u la ïathuh ba ka Sorkar ka la don ka jingthmu ban leh bun tylli ki projek da kaba donbynta lang bun tylli ki tnat treikam naduh ka tnat Forest, PWD, MeECL, bad kiwei kiwei ki tnat na ka bynta ban pyndonkam lang ïa ki jaka jong ki.
U la ai nuksa ruh ïa kawei ka jaka kaba dei jong ka tnat Forest ha Polo kaba dang lait bad khlem pyndonkam ha kaba la aiti mynta sha ka tnat Pynroi Sor na ka bynta ban pynwandur ïa ki jingtei jingshna ki ban long ki jingmyntoi bad yn lah ban leh ki jingpynitynnad bad ki jaka pynïeng kali.
U Myntri Rangbah u la ong ba baroh ka thong ka long ban pynduna ïa ka jingkhapngiah bad ka dheng kali.
U la ong ba na ka bynta ka Secretariat kaba thymmai, ka Detailed Project Report (DPR) bad ‘master plan’ la khmih lynti ban pynbiang ha u Risaw bad yn pyni sha ka Sorkar la kumno-kumno ha u Nohprah mynta u snem.
Nalor kane, u Conrad u la batai ruh ka jingtei ïa ki Skywalk ban kham pynbha ïa ka jingpynïasoh hapdeng ka Khyndai Lad bad kiwei pat ki jaka.
Ki paidbah ka nongbah Shillong kiba la khmih lynti la bun phew snem ban don ki surok kiba ïaid nalor lane flyover kumba long lem ha kiwei ki nongbah, lehse kin sa ïohi ïa ka Flyover kaba nyngkong eh ha kane ka nongbah ha kine ki khyndiat snem ban wan, namarba ka Sorkar ka la pynkhreh ïa ka jingpynwandur ban tei ïa kane ka surok kaba ïaid nalor na Umshyrpi sha Rhino Museum.
Ïa kane la ïathuh da u Myntri Rangbah u Conrad K Sangma haba jubab ïa ka jingkylli la ka Sorkar ka dang lah ne em ban tei flyover ha nongbah Shillong wat hapdeng ka jingbym ïoh jaka bad jingkhapngiah kaba shyrkhei.
U Myntri Rangbah u la ong ba lada dang long, yn pynjrong shuh ïa ka Flyover shaduh thaiñ Anjalee. Lada dang ïoh jaka yn sa nang pynjrong shuh shuh sha kiwei kiwei ki bynta kiba dang lah ban leh.
Hapdeng ka jingkhapngiah kaba jur, bad ka jingthmu ka Sorkar ban wanrah ïa ki projek ban pynduna ïa ka dheng kali, ka jingkylli ka long, hato yn urlong kloi kine ki projek kum ka flyover, skywalk bad kiwei ki projek kiba lah ban pynduna ka jingkhapngiah ha nongbah Shillong.
Haba kylli halor ka rai jong ka Sorkar Pdeng lyngba ka tnat Defence ban pynhap noh ïa ki jaka jong ki Civil Cantonment ha India sha ki Municipal jong ki Sorkar Jylla, u Conrad u la ïathuh ba ha kane ka Jylla ruh ka kam mynta ka la nang ïaid na ka bynta ban pynphai ïa ki jaka kiba hap ha Civil Cantonment sha ka Sorkar Jylla lait noh ki Military Cantonment, ha kaba ka jingïakren ka dang ïaid bad ki bor ba dei khmih haba ïadei bad kane.
Haba kylli halor ka jingbymlah pynïaid da ki bos ban kit ïa ki khynnah skul ban pynduna ïa ka jingkhapngiah, u Myntri Rangbah u la ong ba ka Sorkar Jylla ka la shim ïa ka sienjam hynrei kane ka dang shimpor ban pdiang da ki kmie ki kpa namar ka don jingïadei bad ka jingsngew ïa ka jingshngaiñ ki khun ki kti. Hynrei u la kyrpad ïa ki kmie ki kpa ban pdiang ïa kane ka jingpyrshang kaba ka Sorkar ka la leh da kaba pyntreikam ïa kine ki bos kiba la leh bad pynwandur ha ryngkat ka jingshngaiñ kaba la buh hakhmat eh.
Namar kata, u kyrmen ba namar ka jingdon kiba pdiang ïa ki bos, kan sa don ka jingpdiang bad pyndonkam ïa kine ki bos kiba kit ïa ki khynnah skul bad kan long ka jingïarap ïa baroh ban pynduna ïa ka jingkhapngiah.
Kum ban pynkynmaw, ka Sorkar Jylla ka la pyllait paidbah ïa kine ki bos kiba hap ha ka jingpeit jingkhmih ka Sustainable Transport and Efficient Mobility Society (STEMS) ha u Kyllalyngkot mynta u snem 2023, bad ki don ki bos kiba la sdang treikam naduh u bnai Jylliew mynta u snem.
