Shillong, Naitung:
U President ka FKJGP Sengkmie, Bah Dundee Khongsit u la ong ba ki don ki kyrtong kim nud ban kren ieid jaidbynriew ha kito ki konstitwensi kiba shong khleh jaidbynriew namar ki hap ban pyrkhat ïa ka jingjop ha ka por ilekshon.
U Bah Dundee u la pynpaw ïa kane haba ïakren bad ki lad pathai khubor hadien ba la dep ïakynduh ïa u Chief Executive Member ka KHADC, Bah Pynïaid Sing Syiem kaba long ha ka Sngi Palei ha kamra treikam jong u ha KHADC.
U la ong ba ka jingwan ïakynduh ka seng ïa u CEM ka long hadien ba ka KHADC ka thmu ban pynkhlaiñ ïa ki aiñ ha ki Dorbar ban tehlakam ïa ka jingwan kyrthep ki bar jylla haduh ban da ïoh long ki nongthep vote hapoh ka jylla.
Nangta, u la pynpaw ka jingsngewkhia ba ha Shillong ki la don saw tylli ki konstitwensi kiba la bun da kiwei ki jaidbynriew kiba long ki nongthep vote bad kane ka buh jingma ïa ka jaidbynriew.
Ha kajuh ka por ka seng ka la ïakren ba ka KHADC kan pynkhlaiñ ïa ki Dorbar Shnong ban tehlakam ïa ka jingjyllei u drok.
“Ngi sngewkhia ruh halor ka khaïi ka pateng, namar kata ngi kyntu ïa u CEM ka KHADC, Bah Pynïaid ban pynduna ban ai laisen khaïi sha ki bar jylla lada don ki samla kiba la lah ban trei namar ka sorkar kam lah ban ai ki kam sorkar” u la ong.
Haba phai ha ka imlang ka sahlang, u Bah Dundee u la ong ba ki samla ki la sdang ban ngop ha u jingdih pynbuaid kum u drok, kumta u la kyntu ïa ka KHADC ban kyntu ïa ki Dorbar Shnong ban shna ïa ki aiñ ban khang lang ïa ka jingsniew na u drok.
