Shillong, Naitung 28:
U Myntri ka tnad kam jngoh kai pyrthei, Bah Paul Lyngdoh u la ong ba ka jingpyllait jong ka tnad ïa ki kali kiba kit ïa ki nongwan jngoh kai pyrthei kan pynduna ïa ka jingdon jong ki kali kiba wan na Assam.
“Nga la bthah ïa ki ophisar ka tnad ban ïakren noh mar-mar bad ki para ophisar kiba na Assam khnang ba ngi lah ban ïatreilang bad ba ka ïaid ka ïeng jong ki kali na Meghalaya sha Assam kan ym ïakynduh jingeh,” la ong u Bah Lyngdoh haba kren sha ki lad pathai khubor ha ka Sngi Thohdieng.
Haba ban jur halor katei ka jingdonkam, u la ong ba hap don ka jingïakren khnang ban pynbeit ïa ka jingeh ha ka rukom kaba jai-jai bad da ka jingsngewthuh jingmut.
“Lada ngi shu rai la ka rai ba ym shah, ma ki ruh kin ong ba kin ym shah ïa ki kali jong phi ban ïaid ha Guwahati, te yn leh kumno,” u la buh jingkylli.
Haba kylli, u la ïathuh ba ka tnad ka la pyllait ïa 50 tylli ki kali ba ïadei bad ki kam jngoh kai ki ban kit bit thik tang ïa ki nongwan jngoh kai pyrthei – shisien ba la lah ban pynbeit ïa kane, kata ka jingdon jong ki kali kiba wan na Assam kan sa hiar.
Ha kajuh ka por, haba kdew ba ka tnad ka dang pynithuh ïa ki lynti thymmai na bynta ka leit ka wan jong ki kali, u la ong, “Kum ban shu ai nuksa, ka don kawei ka surok kaba la shna na Mawlyndep (Surok Umïam-Mawlyndep), kaba mut ki kali kim donkam shuh ban wan rung sha Shillong ha kaba ki lah ban poi beit shaduh Sohra.”
Halor ka jingpyllait ka tnad ïa kitei ki kali ba ïadei beit thik tang ban kit ïa ki nongwan jngoh kai pyrthei, u Myntri u la ong, “Mynta ngi dang ïaleh ban pyllait shuh ïa bun tylli kiba kum kine ki kali (kumba 500) ha kine ki 5 snem ban wan.”
U la ong ruh ba ha u Lber jong u snem ban wan, ka tnad kan sa pyllait biang sa 50 tylli kiba kum kitei ki kali.
Shuh shuh u la bynrap, “Kane kan pyndap ïa ka jaka ba thylli ba ngi don mynta bad haba phi ai mynsiem ïa ki nongwan jngoh kai ba heh spah, phi kyntiew ruh ïa ka kam jngoh kai jong ka jingkitkhlieh namar dei kine kiba lah ban kham pynlut ha ka tnad kam jngoh kai.”
