Shillong, Naitung:
U Myntri ka tnat Social Welfare ka Jylla, Bah Paul Lyngdoh ha ka Sngi Palei u la kubur ïa ka jingshisha ba ïa ka jingheh jong ka jingkulmar kaba la mih bad jia ha nongbah Tura ha ka Sngi Nyngkong ka dei kaba lah ban tehlakam. U Myntri u la ong ruh ba bun kiei kiei kin sa paw ynda la lah ban pyndep ïa ka jingtohkit kaba pura bad u la ïathuh ba la dep ban thaw ïa ka jingtohkit kaba halor ne kata ka ‘high level investigation’ da ka tnat Kam Pohïing ban khmih bniah halor kane ka kam.
Kane ka jingpynpaw jong u Bah Paul ka long ruh hadien ba na ka liang jong u Director General of Police (DGP) haba kren sha ki lad pathai khubor u la pyntip ba ka jingmih ka jingkulmar bad huri-hura ha Tura, ka dei kaba la dep ban ïasuhbuit lypa.
Lah ban pynkynmaw hangne ba ha ka Sngi Nyngkong jong ka taïew, katba ka jingïalang hapdeng u Myntri Rangbah ka jylla bad ki kynhun seng ka dang ïaid bad poi sha kaba kut artad, kyndit-kynsan ka la mih ka jingkulmar ha kaba ka la don ka jingkawang bad lun maw da ki paidbhur sha ki pulit pahara bad ban wiang ding ïa ki kali bad pynjulor ruh ïa kiba bun ki jingdon jingem ka Sorkar.
