Shillong, Naitung 28:
U Myntri Rangbah, Conrad K Sangma u la ong ba ka jingkem halor ka jingjia ha Tura ka dei katkum ki sakhi- sabut ym ba ka dei na ka jingdonbynta bad kano-kano ka seng saiñ pyrthei.
Haba ïakren bad ki lad pathai khubor ha ka sngi Thohdieng, u Conrad u la batai ïa kaei kaba la jia ha ka 24 tarik ha por ba dang ïaid ka jingïakynduh bad ki nongïalam jong ka kynhun kaba wanrah ïa ki mat jingdawa halor ka nongbah por tlang bad roster system, bad ka jingmynsaw ki pulit pahara.
U la ong ba wat ki nongïalam jong kine ki kynhun ki la lyngngoh ïa ka jingdon ki briew ki bym lah ban ithuh bad kiba khlem donbynta ha ka jingshah jingit.
“Nga dei manga uba kwah ban leit ïakren bad ka kynhun jong kiba shah thngan ha ka jaka ba don ka shlem treikam u Myntri Rangbah wat la ka jingïakynduh ka dei ban long ha Tura Circuit House,” la ïathuh u Conrad.
U la ong ba ki sakhi bad ki sabut ki don ha kaba ki briew ka aiñ ki pynshong nongrim ban ithuh ïa kiba donkti ban thaw jingkulmar ha kato ka sngi.
Haba kylli halor ka jingkynnoh u nongïalam ka TMC u Dr Mukul Sangma ba ka rukom leh ki pulit ka long ba ki long kum ki atiar jong ki heh kiba bat ïa ka bor synshar, bad ba u DGP bad SP ka West Garo Hills ki buh jingma ïa ka jingim u Myntri Rangbah, na ka liang u Conrad u la ong ba ka jingkynnoh kam shong nongrim namarba ki pulit ki pyndep ïa ka kamram ban ïada bad ki la ai jingïada ruh ïa u ha kato ka sngi bad ïa baroh kiba don ha kato ka sngi ba mih ka jingshah thombor ha ki ’riew shim kabu.
U la ong ba hadien ba la dep jia ka jingkulmar, ki pulit ki la lap ba la don sa ki maw bad umphniang petrol ban leh ïa ki kam ki ban pynthut ïa ka shongsuk shongsaiñ.
Kumta u la ong ba ka jingkem ïa ki briew kiba donkti kam dei satia kumba kynnoh ba ki dei kiba don jingïadei bad ki seng saiñ pyrthei, hynrei ka jingkem ka dei beit katkum ki sakhi ki sabut kiba la don lypa.
U Myntri Rangbah u la ong ba u la leit khnang ban ïakynduh ïa ki nongïalam kiba shah jingit da ka jingkhuid mynsiem bad ka jingthmu babha ban ïakren bad shim ka ki lad ban pynbeit ïa ki jingeh.
Hynrei ka jia pynban kumto ha kaba ki nongïalam kiba wan sha ka jingïakren ruh ki lyngngoh namarba kim ithuh ïa kito ki briew kiba wan ïalum kynsan da ki spah ngut, namar ha kiwei ki sngi ba ki shong shah jingit, ki don tang khyndiat ngut kiba wan ban ai jingkyrshan bad ai mynsiem ïa ki.
U la ong ba ka long kaba bakla ban pyrkhat ba kito kiba wan ha kato ka sngi kin shim ïa ka aiñ ha kti lajong bad leh katba sngew dei maki ban thaw ka huri-hura, katba ma u bad ka kynhun ba shah jingit ki don ka jingthmu babha ban poi sha ka jingbha ban pynbeit ïa ki jingeh kiba don hakhmat.
Kumta u Conrad u la ong ba un hap ban shim lang ïa ka jingbatai ki bor pahara lada u dei ban ïakynduh biang ha ka sien ka ban wan, bad ïa mynta la hap pynsangeh shwa tat haduh ban da pynbeit da kumwei pat.
