Shillong, Naitung:
U Bah Paul Lyngdoh uba dei u Myntri hapoh ka Sorkar Jylla u la shim ba ka jingkynthoh bad kynnoh jong ka kynhun Legal Rights Observatory (LRO) lyngba ka ‘Twitter’ ka dei ka bym don nongrim bad ka kynhun bym don jingkitkhlieh hynrei kaba kwah ban wanrah ka jingsngew ïapher niam bad pynthohbria ïa ka Meghalaya.
Lah ban pynkynmaw ba ka Legal Rights Observatory- LRO lyngba ka Twitter, ka la kynnoh ba ka dei ka seng Khasi Students’ Union (KSU) kaba la don bynta ha ka ban thombor ha Mahadev Khola ha ka sngi Nyngkong.
U Bah Paul u la ong ba katei ka kynhun ka dei ka bym don ïa ka jingkitkhlieh bad ka pyrshang ban pynkylla ïa katei ka jingjia kum ka jingïapher niam bad ka pyrshang ban pynthohbria ïa ka jylla Meghalaya.
Ha kaba ïadei bad katei ka jingkynnoh ka LRO pyrshah ïa ka seng KSU, u Bah Paul u la pynrem jur bad shim ba kine ki jingkynthoh ne kynnoh ki dei tang ka lynti ban pynthohbria ïa ka Megha-laya bad ki nongshong shnong jong ka.
Lah ban pynkynmaw ruh ba ha kaba ïadei bad ka jingkynnoh ka LRO, na ka liang ki nongïalam ka KSU ki la ujor da ka ejahar halor ka jingpynthohbria bad jingpynbudnam ïa ka seng baroh kawei.
