Los Angeles:
U dkhot ka kynhun rwai Eagles uba long ha kajuh ka por uba la don bynta ban seng ia kane ka kynhun u Randy Meisner u la khlad noh na kane ka pyrthei. Katkum ka khubor ba la ioh la iathuh ba une u nongrwai u la khlad ha ka rta kaba 77 snem.
U Randy u la seng ia ka Eagles lem bad u Glenn Frey, Don Henley bad Bernie Leadon ha u 1971 bad ka khubor na Hollywood ka iathuh ba ka jingkhlad u Randy ka dei na ka jingshitom kaba u la ioh ka Chronic Obstructive Pulmonary disease (COPD).
U Randy u la don bynta ban rwai bad ban thoh ia ki katto katne ki jingrwai ba sngewtynnad jong ka Eagles kiba kynthup kum ka Desperado, On The Border, One of These Nights bad Hotel California.
Ha kajuh ka por u la thoh ruh ia kawei na ki jingrwai ba iaid bad ba khring bha ia kiba bun ki nongsngap ka “Take It To The Limit” kaba ula shim bynta ruh ban rwai ia ka.
Ki dkhot ba dang sah jong kane ka kynhun ki la pynmih kawei ka jingthoh ha kaba iadei bad ka jingkhlad noh u Randy da kaba ong ba ka long ka jingduhnong bakhraw ia kane ka kynhun bad iathuh ba ula noh synñ iang bha sha ka Eagles bad u la trei shitom ruh ban kyntiew ia kane ka kynhun rwai kumne kum ba ka long mynta.
U Randy ula long ruh u nongtem Bass ka Eagles bad ka jingduhnoh ia u ka la pynsngewsih bad pynpait dohnud bha ia baroh ki dkhot ka Eagles bad ha kajuh ka por ia ki nong kyrshan kane ka kynhun.
Ha shwa ba un snohkti bad ka Eagles u Randy ula long ruh u nongtem Bass ka kynhun Poco kaba kynthup ruh ia u Richie Furay bad Jim Messina.
