Shillong, Naitung 28:
Ka Khasi Students’ Union (KSU) ha ka Sngi Thohdieng ka la pynpaw ka jingbitar ïa kawei ka lad pathai khubor ba paw ka ri – ka ‘Times Now’ kaba la pynmih ïa ka khubor kaba noh shiliang halor ka jingjia ha Mahadev Khola.
“Lada phi peit kine ki lad pathai khubor na ri-thor, ki leh shiliang bha bad ka tarajur jong ki ka noh bha haba ïadei bad ki bar Jylla. Haba ki pynmih ïa kano-kano ka khubor, kim ju ai ïa ka khubor na baroh arliang mamla bad lada ki ai ruh, ïa kawei ka liang (kaba dei ka liang jong ki Khasi), ki ju thoh ha kata ka rukom ban pyni ba ngi dei kiba sniew ne ba ngi bakla ma ngi,” la ong u General Secretary ka KSU, samla Donald V. Thabah haba kren sha ki lad pathai khubor.
Haba pynkynmaw ïa ka jingïakhih CCA, Them Metor, u la ong ba watla ki lad pathai khubor na ri-thor ki wan shane ban wad jingtip halor ka CCA bad Them Metor, hynrei haba ki kylli jingkylli, bad haba la pynshai halor ki jinglong-jingman, ki jingkren jong ki trai-ri trai-muluk barabor kim ju poi shano-shano naba kim ju da kham pynmih, pynban ki pynmih bha tang na ka liang ki bar Jylla.
Haba kdew ba ka jingleh jong ka ‘Times Now’ kam dei shuh kaei-kaei kaba phylla, u la buh jingkylli ba kumno kita ki nongthoh khubor ki long ki bym larkam ne bym don sap ban long nongthoh khubor namar ha ka jaka ban tih bniah ïa ka jingshisha, la shu pynmih beit ïa ka khubor kaba la ïoh tang na shiliang.
“Bun kiba la ïakren halor ka jingïashoh ïadat ba tang namar ka ‘Amul Kool’, mih ka jingïakynad hapdeng ki 2 kynhun…kam don ka jingïashoh hapoh ka jaka mane hynrei ka dei habar dukan bad ki bor ka aiñ ruh ki la kren ba ki kynhun niam – ki Balang Khristan kim donkti, ka KSU kam donkti,” u la ong.
Halor ka jingkynnoh jong ka Legal Rights Observatory (LRO), Hindu Rashtra bad kawei ka sla BJP, kiba la sam ïa ka jingthoh ka LRO kiba kynnoh ba ïa katei ka kam la leh da ki dkhot ka KSU, utei u samla nongïalam u la ong ba ka ‘Times Now’ ka la shim beit tang ïa ka jingthoh ka LRO bad kam shym la wad jingtip na ka seng halor katei ka jingjia.
“Nga tharai ba don mano-re-mano ba la shu phah bad ka ‘Times Now’ ka pyni shai ïa ka jingnoh jong ka tarajur ban ïashah ïa kiwei pyrshah ïa ngi,” u la ong.
Ka seng ha kawei ka liang ka la kren shai ba ai kiba kynnoh kin nang kynnoh hynrei kitei ki jingpyntieng koh tympan kin ym lah ban pynran dien ne pynduh mynsiem ïa ka seng namar kan ïeng ha kajuh ka nongrim.
“Nga tharai ki la kwah ban buh noh ïa ka KSU sharud hynrei ki don na ki bar jylla na shane kiba kynshoit ba dei ban don eiei shaphang ka KSU khnang ban shah kynnoh. Kane ka dei ka buit jong ki ba lada ki pyni ïa ka shap jong ka seng, ki briew kiba peit kin ong ba dei kane ka seng kaba donkti,” la ong u samla Thabah.
Haba kynthoh, u la ong, “Ki kynhun kum ka LRO lem bad kiwei-kiwei ki kynhun seng niam bar Jylla…ka jingthmu jong ki hi namar ki sngewthuh ba da ka thma jaitbynriew kan eh bha ïa ki, ki kwah ban pyndonkam noh da ka niam khnang ban ïakhun pyrshah ïa ka jaitbynriew Khasi kumjuh ïa kiwei ki ’riewlum ki bym dei kajuh ka niam bad ki.”
Shuh shuh u la bynrap ba kitei ki briew ki don shane watla ka ‘Headquarter’ jong ki ka lah ban dei na shabar.
“Lada dei nabar kumno tang hapoh ki khyndiat kynta kane ka LRO kan ïoh ïa ka khubor halor ka jingïashoh ha Mahadev Khola bad kynnoh ïa ka KSU,” la ong utei u samla nongïalam.
