Shillong, Naitung 28:
Ka kynhun Legal Rights Observatory (LRO) ka khlem pat sangeh ban kren halor ka jingïakajia ha Mahadev Khola kaba la jia ha ka Lah Sngi U Blei bad ka dang pyrshang hi ban pyni ba ka dei ka jingthombor ïa ka jaka mane blei watla ki pulit ka East Khasi Hills ki la dep pynshai ba kaei kaba la jia kam don jingïadei eiei bad kano-kano ka niam.
Ha ka Sngi Thohdieng, kane ka kynhun ka la kynthoh biang ha ‘Twitter’ da kaba pynkynmaw ba ka seng Khasi Students’ Union (KSU) kumba katto katne por mynshwa, ka la leit rah da ka jingujor.
“Ka KSU ka la leit ujor pyrshah ïa ka Mahadev Khola temple; ki Alien na Mars ki la ïoh mynsiem bad ki la thombor ïa ka Temple, shoh ïa ki rangbah niam!” la ong ka LRO ha ‘Twitter’ ha kaba ha ka ktien nongwei ka la ong: “KSU submitted complaint against Mahadev Khola temple; aliens from Mars drew an inspiration n attacked temple, thrashed priest!”
Shuh shuh ka LRO ka la ong ba watla ka long kumno-kumno, ka kynhun jong ka kan bteng ban ai jingïarap ïa ki 1,839 ngut ki samla pule na Meghalaya kiba don ha kylleng ka Ri India.
Nalorkata, ka la kam ruh ba kito kiba la donkti ha katei ka jingjia ha Mahadev Khola, kaba ka la kynnoh ba ka dei ka jingthombor ïa ka jaka mane, kin sa shah kem lada ki mih na Meghalaya bad mar ïa lait na Jorabat.
Lah ban kdew hangne ba ka KSU Laban Circle ha ka 5 tarik Naitung, 2023, ka la leit ban aiti ïa ka dorkhas sha u Divisional Forest Officer (DFO) ka East Khasi Hills halor ka jingsah be-aiñ ki bar jylla ha Mahadev Khola.
Katkum ka jingwad bniah jong ka KSU, ka lap ba ka tnad khlaw ka la ai jaka sha ki ’riewniam Hindu ban shna ïa ka Mandir ha Mahadev Khola ha u snem 1923 bad ka jingai jaka ka long beit thik ban lehniam bad ym ban buhai shnong.
Hynrei ha ka jingleit jurip jong ka seng la lap ba la don haduh 30-40 tylli ki longïing ba nabar Jylla bad bun tylli ki dukan (jong ki bar jylla) ba la pynïeng bad kiba wan sah ha katei ka jaka khlem kot khlem sla.
“Kaba kham ishyrkhei ka long ba ïa kane ka jaka ki Dorbar Shnong kim shym la kam namar ba ka dei hapoh ka jingpeit ka tnad khlaw bad ki bar jylla ki ïoh rung ïoh mih katba mon khlem kano-kano ka jingpyrkhing,” la ong ka kyrwoh na ka seng ha ka 5 tarik Naitung.
Ka KSU ka la kdew ruh ba ïa ki jaboh na ki tyllong ïing la lap ba la pyntuid beit sha ka wah bad ïa ka jaboh la shu bret pathar khlem da ñiewkor ïa ka mei mariang.
Shuh shuh ka la bynrap ba katei ka jaka ka long ruh kum kawei na ki ktem jong ki nongdih drok bad bun tylli ki jingjia shah tuh sha lute kiba ju jia na ka por sha ka por.
Na ka liang u DFO u la pan por na ka Seng ba un leit jurip bad ban pynmih ïa kitei ki briew kiba sah be-aiñ.
