Shillong, Naitung 28:
U Myntri ka tnad Social Welfare, Bah Paul Lyngdoh ha ka Sngi Thohdieng u la ong ba ka tnad ka la dep ban mynjur ïa ka jingthung kam jong 6 ngut ki Child Development Project Officer (CDPO) bad hapoh artaïew kin sa pynïasoh noh sha ka kam.
“Haba ïadei bad ka tnad Social Welfare, baroh shi katta ka don ka jingduna ha ka liang ki CDPO, hynrei ka khubor kaba sngewtynnad ka long ba mynta ngi la lah ban mynjur ïa ka jingthung kam jong ki 6 ngut ki CDPO,” la ong u Bah Lyngdoh haba kren sha ki lad pathai khubor.
Na ka liang u Myntri u la ïathuh ba ha kiba bun ki jaka, ki don ki CDPO kiba hap peit lang ïa 2 tylli ki Block, hynrei kane mynta kan sa kylla naba la ïoh ban pynrung ïa 6 ngut bad kine kin shakri ha ki tnad treikam kiba khlem ki CDPO – kaba la pyndkoh shi kat dei ïa ka jingtreikam jong ka tnad.
“Hapoh artaïew, kine ki lah ban leit pynïasoh sha ki tnad treikam bapher-bapher,” la ong u Bah Lyngdoh.
Ha kawei ka liang, haba ïadei bad ka jingsahkut pisa ki nongtrei Anganwadi ha kaba ki don ki bym shym la ïoh tulop la 6 bnai bad palat ïa kata, u Myntri u la ong ba u la dep khmih bniah ïa katei ka kam ha ka Sngi Palei ha ka jingdonlang u Commissioner & Secretary bad Director ka tnad Social Welfare.
“Ïa ka tulop jong baroh ki nongtrei Anganwadi, ngin pynkhuid lut ha kaba kut jong mynta u bnai, mut baroh ki ‘arrear’ kiba sahkut, kin sa ïoh noh. Kaei kaba ngi la leh ka long ba ngi la pynkhreh ba hapoh ka 31 tarik mynta u bnai, ngin pynkhuid lut ïa baroh ki ‘arrear’,” la ong u Bah Lyngdoh.
