Shillong, Naitung 28:
Ka Meghalaya Youth Tourism Development Society (MYTDS) ka la pynbna sa shisien ba ha kane ka kynti kaba mynta kan sa pynlong biang ïa ka rynsan ïakob ’thei bhabriew kaba la tip kum ka Miss Meghalaya bad ka Miss Teen Meghalaya 2023 ka ban sa long ha ka 9 tarik u Nailur, 2023.
Ïa ka Auditions yn sa pynlong ha ka 12 tarik u Nailar, 2023 ha Youth Hostel ha kaba ki nongïashimbynta ki ban shah jied kin hap ban wan shah pyntbit bad shah hikai ha ki klas ai jinghikai ka ban sdang naduh ka 28 tarik u Nailar haduh ka 8 tarik u Nailur, 2023.
Haba kren sha ki lad pathai khubor, u Bah Brian Wahlang uba dei uwei na ki nongpynïaid jong katei ka jingïakob, u la ong ba katei ka rynsan ïakob ’thei bhabriew kan ïarap shikatdei eh ïa ki samla kynthei ba kin long kiba shlur hapoh rynsan.
“Nga sngew ba ki rynsan kum kine kiba ailad ïa ki samla kynthei kan ïarap shikatdei eh ïa ki ha ki por ki ban sa wan namar lyngba kane ka rynsan kan ïarap ïa ki ba kin long kiba shlur halor ka rynsan”, la ong u Bah Wahlang.
Nangta, u la ong ba ki khynnah samla ki donkam shisha ba kin long kiba shlur ban ïeng bad ban kren ïa ki mat kiba ki sngew dei ban kren bad kin pynsngew ïa la ki jong ki jingsngew namar baroh ki samla ki don la ki jong ki jingpynsngew bad bunsien kim ju ïoh lad satia ban pynsaphriang ïa ka khubor kaba ki sngew bad kane ka jingïakob kan long ka rynsan kaba biang eh ïa ki ba kin kren bad pynsngew.
“Kaei kaba bun na ki khynnah samla mynta ki duna mynta ka dei ka jingshlur bad ban don ka jingngeit halade ban pynbna ba ki lah ban leh kaei kaei”, la ong u Bah Wahlang.
Nalor kata, u Bah Wahlang u la ong ba bun ki khynnah samla ka jylla ki ju don ka jingsngew ba kiwei kiwei ki samla ki kham biang bad ki kham stad ban ïa ki, hynrei haba ki ïakhun bad kiwei pat ki samla na kiwei ki jaka, la lap ba kine ki samla ka jylla ka jong ngi ki leh bha shibun eh, hynrei kaba donkam ka long tang ban ai mynsiem ïa ki ba kin long kiba shlur ba ki lah ban leh kaei kaei ha ka jingim ka jong ki ban ïoh kheit ïa u soh ka jingjop.
Na ka liang ka Kong Rochelle Wahlang kaba dei ka nongjop jong ki rynsan ïakob ’thei bhabriew ha ki por ba la leit, ka la ong ba ka kwah ban ïohi ba ki khynnah samla kin mih shakhmat ban ïakhun ha kane ka rynsan.
Ka Kong Wahlang ka long ba kum ka nongïashim bynta ha ki rynsan ïakob ’thei bhabriew katei ka rynsan bad ka jingïaid lynti jong ka, ka la pynlong ïa ka ba kan long ka briew kumba ka long mynta.
Kane ka rynsan ïakob Miss Meghalaya kan dei ha ka sien kaba saw ka ban sa pynlong biang.
