Jowai Naitung:
U MLA ka Jowai, Bah Wailadmiki Shylla u la sam ïa ki tiar rep tiar riang bad kor ne Agri-Tools and farm machineries sha ki 12 tylli ki IVCS (Integrated Village Cooperative Societies) jong ka Thadlaskeiñ bad Amlarem Block ha ka jingïalang kaba la pynlong da ka District Project Management Unit, West Jaiñtia Hills District Tyrshi Inn, Khliehtyrshi.
U Bah Wailadmiki Shylla ha ka jingkren u la ong, ka long kaba donkam ban don ka jingïatreilang hapdeng ki tnat sorkar, ka IVCS bad ki nongrep khnang ban lah ban kyntiew ïa ka ïoh ka kot ki nongrep. U la pynshlur ïa ki nongrep ban shim ba ka rep ka riang kum kawei ka lad kamai bad u la kyntu ban pynmlien lang ïa ki khun ki kti ha kane ka kam. U la ai jingmut ruh ïa ka DPMU ban pynlong ïa kum kine ki jingïalang ha ki ïew ki hat ban khring ïa kiwei ki nongrep.
U Deputy Commissioner u Bah BS Sohliya, IAS, ha ka jingkren u la kyntu ïa ki IVCS ban shimkhia ïa kine ki tiar kum ki trai bad ha kaba ïadei bad ka jingpynïaid ïew ïa ki mar yn sa khot ïa ka jingïalang bad ka DPD, M-LAMP Project bad kiwei ki tnat sorkar. U Bah A Suting, Deputy Project Director, M-LAMP u la ïathuh ïa ka thong jong ka project ka long ban pynjanai ïa ka kam ki nongrep.
Kiwei kiba la ai jingkren ki long u Bah M Lamare, Assistant District Agriculture, ka Kong E Buam, Deputy Manager, DPMU, u Bah S Rani, District Horticulture Officer bad hashwa kane u Bah S Lyngdoh, DPM, DPMU u la ai ka jingkren pdiang ha ka jingïalang kaba la pynïaid da u Starwell Paduna, Deputy Manager, DPMU bad haba kut ka jingïalang la ïoh ki kyntien khublei na ka Kong M Syngkon, Assistant Manager, DPMU.
