Shillong, Naitung 28:
Ka Sorkar Pdeng ha ka Sngi Thohdieng ka la pyntip ha Dorbar Lok Sabha ba haduh mynta, kam don satia kano-kano ka jingthmu na ka liang ka sorkar ban pynwai lang ha kajuh ka por ïa ka samoi jong ka Dorbar Lok Sabha, ki Dorbar Assembly ha ki jylla bad kiwei pat.
Ka jubab halor kane ka la wan na u Myntri ka tnat Aiñ, u Arjun Ram Meghwal, halor ka jingkylli u MP Lok Sabha, u Gopal Chinnaya Shetty.
U Shetty u la kwah ban tip la ka sorkar ka la shim ne ka thmu ban shim ïa ki sienjam da kaba ïakren bad ïamir jingmut lang bad ki sorkar jylla na ka bynta ban pynwai lang ha kajuh ka por ïa ka samoi treikam jong ka Dorbar Lok Sabha, ki Dorbar Assembly bad ki Local Body (Panchayat), bad ban pynlong beit tang kawei ka ilekshon ha kajuh ka por.
U Shetty u la ong ba kane ka jingpynwai ïa ka samoi jong kitei ki Dorbar bad ban pynlong tang kawei ka ilekshon ka long na ka daw ba ka jingpynlong ilekshon na ka por sha ka por ka wanrah tang ïa ka jinglutksan kaba shyrkhei bad ka jingdonkam ïa kiba bun ngut ki briew ban pynïaid ïa ki ilekshon.
Hynrei na ka liang u Myntri ka tnat Aiñ u la jubab kam don satia kano-kano ka jingthmu kaba don hakhmat jong ka Sorkar Pdeng ban shim ïa kaba kum katei ka sienjam ba la kdew da u MP.
