Shillong, Naitung 28:
Ka Meghalaya State Commission for Women (MSCW) kam slem shuh ban ïoh ïa ki nongkitkam kiba thymmai kynthup ïa ka Chairperson namarba la dep ban thaw ïa ka Search Committee ban ïit ïa ki briew kiba dei ban don ha ka Commission.
Haba ïathuh ïa kane sha ki lad pathai khubor ha ka sngi Thohdieng, u Myntri ka tnat Social Welfare, Bah Paul Lyngdoh u la ong ba ka Search Committee kaba la thaw ha ka 24 tarik mynta u Naitung, ka kynthup ïa ka Commissioner and Secretary ka tnat Social Welfare bad kiwei ki dkhot.
Ka Search Committee ka don ïa ka samoi treikam kaba lai snem lynter namar lada don ki dkhot ka MSCW kiba iehnoh kam, ka Committee kan ïit briew thymmai biang ban ïoh ïa ki dkhot. Kumta ka Search Committee kam dei bam shu kut noh tang ynda la ïoh ïa ka Chairperson bad ki dkhot kiba thymmai ka MSCW.
Namar kata, u Bah Paul u la ong ba hapoh shibnai, la khmih lynti ba ka Search Committee kan phah ïa ka kaiphod bad ki briew kiba dei ban long ki dkhot ka MSCW.
Ka MSCW kam don Chairperson hadien ba ka Kong Phidalia Toi kam dei shuh ka Chairperson jong ka Commission.
