Mariang, Naitung:
Kum shi bynta ban bud ryntih ïa ka hukum ba la pynmih da ka Meghalaya High Court ha ka 26 tarik Jymmang, 2023, u District Magistrate ka Eastern West Khasi Hills District u la pynmih hukum hapoh ka kyndon 144 CrPC kaba mana ïa ka jingbuh ne jingwah pathar ïa ka doh khlem kano-kano ka jingda, jingtap ne jingker da ki nongdie doh kiba ju die doh hapoh ka distrik.
Katkum u District Magistrate, ka jingbuh bad jingwah pathar ïa ka doh da ki nongdie doh ka lah ban wanrah ïa ka jingjaboh jong ka doh lyngba ki pum-pum bad ka lah ruh ban pynsniew ïa ka doh kaba lah ban wanrah kylla ïa ki jingpang sha ki nongbam ïa ka. La pynmih ruh ïa kane ka hukum kum shi bynta ban pynthikna ba la leh bha bad leh thikna ïa ka rukom ot bad buh doh da ki nongdie doh bad ka rukom ri ïa ki mrad da ki paidbah kiba ju ri ïa ki, kaba kynthup ruh naduh ka rukom kit rukom bah ïa ki mrad ban ri lane ban bam doh.
Kino kino napdeng ki nongshong shnong kiba shah ktah ha katei ka hukum ki lah ban leit mih sha ki bor ba dei khmih halor kane ka bynta, la ong ka hukum jong u District Magistrate.
