Shillong, Naitung 30:
Ka jingjyllei ki ar shaka ha nongbah Shillong ka dei kawei na ki daw ba ki surok ruh ki la nang khapngiah, bad ka jingjur ka dheng kali ka dei namar ka jingïaid ki ar shaka katba mon khlem da bud ïa ka rukom pynïaid kali.
Ha nongbah Shillong, tang ki ar shaka, kiba don number plate ML05, ki long 72,309 tylli tat haduh ka 21 tarik mynta u Naitung.
Nalor ba ki la bun bha ki ar shaka ha surok, la sakhi ba ki nongñiah ar shaka ki ñiah katba mon ha surok khlem da bud ïa ki kyndon pynïaid kali. Kane ka jingleh jong ki ka la nang pynjur ïa ka dheng kali ha Shillong.
Ha ki surok ha kylleng ka nongbah, kumba bun ki nongñiah ar shaka ki ju ñiah sted, bad ha ka por ba don ka dheng kali kine kim ju sahkut bad kin ïaid beit katba mon da kaba rung kat naba lait, khlem da bud ïa ki kyndon ñiah kali.
Kaba kham buh jingma eh ïa ki kali bad ki paidbah ka long ba kine ki ar shaka, kin rung beit wat na ka liang kadiang kaba dei ka liang ka bym dei (wrong side) ha ryngkat ka ñiah sted. Haba jur ka dheng kali, ki nongñiah ar shaka kin tur beit shakhmat khlem kheiñ ïa ki kali kiba wan mar pyrshah na kawei pat ka liang.
Ha ka surok kaba ngiam tang ar tylli ki kali, bunsien ki kali kiba wan na kawei pat ka liang, ki hap ban sahkut noh ha ka dheng kali namar ka jingtur ki scooty kiba kwah ban tam shakhmat ïa kiwei pat ki kali. Ki nongñiah jong kine ki ar shaka wat lada ki la tip bad ïohi ba ka surok ka khapngiah bad hap ban ailad tang ïa ki kali kiba wan pyrshah na kawei pat ka liang, hynrei ki tur khnang tang namarba ki kwah ban poi kloi.
Ki nongñiah kali shimet bad nongñiah taksi bunsien ki hap ban mad ka jingshah syllud bad takhuh kali bad kine ki ar shaka namar ki la ïaid katba mon bad kin tur beit la ka dei na ka liang kamon ne ka liang kadiang, bad buh jingma ïa kiwei pat ki kali bad ki briew kiba ïaid harud surok.
Bun ki nongshong kali ruh ki ju thnum ïa ka jingleh ki ar shaka bad buh jingkylli ruh ïa ki briew ka aiñ, “hato ki surok ha Shillong ki dei tang ïa ki ar shaka ba kin ïaid katba mon?”
Ka jingbym bud ki nongñiah ar shaka ki kyndon pynïaid kali ka la nang wanrah jingeh shuh shuh khamtam ha ka por ba jur ka dheng kali namar kine ki rung beit kam phet lada ka khapngiah ne dheng kali katno katno ruh, bad kane ka la nang pynjur shuh shuh ïa ka dheng kali.
Kumta kiba bun ki nongñiah kali, ki nongshong kali kamai bad ki paidbah kiba ïaid lynti ki la pynsngew ba ki pulit kiba dei ki nongpyntreikam ïa ka aiñ ki dei ban peit ïa kane, bad tehlakam ïa kine ki ar shaka, lym kumta ka dheng kali kan nang jur, bad ka jingma na ki jingjia ïatyngkhuh kali ruh ka ap ïa ki paidbah.
